Rossiya prezidenti Vladimir Putin Donald Tramp bilan Ukraina bo‘yicha bo‘lajak muzokaralarda Kiyevdan NATO bilan harbiy hamkorlikni keskin qisqartirishni, shuningdek, blokka a’zo bo‘lish rejalaridan butunlay voz kechishni talab qilmoqchi.
Bloomberg suhbatdoshlarining aytishicha, Putin jang maydonida ustunlikka ega ekaniga ishonadi va shu sababli Ukrainani cheklangan qurolli kuchga ega neytral davlatga aylantirishga intilmoqda.
Shuningdek, Kremlning pozitsiyasi shundan iboratki, NATO a’zo davlatlari Ukrainaga yakka tartibda qurol yetkazib berishni davom ettirishi mumkin, biroq ularning qurollari Rossiyaga qarshi yoki boy berilgan hududlarni qaytarib olishga urinish uchun ishlatilmasligi kerak.
Manbalarga ko‘ra, Putin uch yillik urush davomida Rossiya armiyasi egallab olgan Ukraina hududining kamida 20 foizi ustidan Rossiya nazoratni saqlab qolishini talab qilmoqda. Shu bilan birga, agentlik manbalari Moskva “ba’zi hududlarni almashtirishga” tayyorligini qayd etgan.
Nashr manbalarining ta’kidlashicha, taxminan bir yil oldin Putin norasmiy kanallar orqali AQSHga Ukrainaning betaraf maqomi haqidagi talabdan voz kechishga va hatto kelgusida NATOga kirishiga ruxsat berishga tayyorligini ma’lum qilgan.
“Biroq o‘shandan beri Ukraina armiyasi uchun frontdagi vaziyat yomonlashgan, Rossiya qo‘shinlari Donbassga yana hujum qila boshlagan va bu Putinga dadillik bergan”, deydi agentlik suhbatdoshlari.
Aniqlanishicha, hozirda Rossiya va Ukraina har ikki mamlakatning atom elektr stansiyalarini zarbalardan himoya qilish uchun Qatarda cheklangan muzokaralar olib bormoqda.
Kremlning xalqaro siyosatiga aloqador ikki rossiyalik amaldor avvalroq ma’lum qilganidek, Kreml va AQSHning yangi ma’muriyati o‘rtasidagi muloqot “jamoalar darajasida” 2024-yilning noyabr-dekabr oylarida yo‘lga qo‘yilgan, shuningdek Putin va Tramp o‘rtasida birinchi to‘g‘ridan-to‘g‘ri aloqa o‘rnatilgan.
Ularning so‘zlariga ko‘ra, Kreml va Tramp jamoasi muloqot boshlanganini ataylab e’lon qilmagan va OAV xabarlari paydo bo‘lganidan keyin uni har tomonlama rad etgan, bu esa AQSH amaldorlarining bo‘lajak prezidentga bosimidan qochish uchun qilingan.
Izoh (0)