Braziliya sobiq prezidenti, o‘ngchi Jair Bolsonaruning tarafdorlari 8-yanvar kuni yangi prezident Luis Inasiu Lula da Silvaga qarshi namoyish uyushtirib, Braziliya Milliy Kongressi, prezident saroyi va mamlakat Oliy sudiga bostirib kirdi. CNN ma’lumotlariga ko‘ra, ular politsiya bilan to‘qnashgan va ushbu binolarga kirish yo‘lini to‘sib qo‘yishga uringan. 2019-yildan buyon Braziliya rahbari bo‘lgan Bolsonaru 2022-yilning kuzida o‘tkazilgan saylovlarda mag‘lubiyatga uchragandi. Bir hafta oldin Braziliyada yangi prezidentning inauguratsiyasi bo‘lib o‘tdi – sotsialist Lula da Silva uchinchi marta prezident lavozimiga kirishdi.
Braziliyadagi voqealar 2020-yil oxiridagi AQSH saylovlarida mag‘lub bo‘lgan Donald Tramp tarafdorlarining 2021-yil yanvarida Kapitoliyga qilgan hujumi bilan taqqoslanmoqda.
Braziliya bayroqlarini ko‘targan namoyishchilar hukumat binolari, jumladan Oliy sud, Milliy kongress va davlat rahbarining ishchi qarorgohi – Planaltu saroyiga bostirib kirgan. Ular oynalarni sindirib, vandalizm harakatlarini amalga oshirgan. Politsiya namoyishchilarni tarqatish uchun ko‘zni yoshlatuvchi gaz va shovqinli granatalardan foydalangan.
Hodisa paytida Braziliya prezidenti Lula da Silva poytaxtda bo‘lmagan – u suv toshqini oqibatlarini tekshirish uchun San-Paulu shtatiga ketgandi.
Shturm fonida Da Silva oy oxirigacha Braziliya poytaxtida favqulodda holat e’lon qildi va tartibsizliklarga qarshi kurashga federal kuchlarni jalb etish bo‘yicha ko‘rsatma berdi. Braziliya jamoat xavfsizligi direktori Anderson Torresni o‘z lavozimidan chetlatildi. Torres ilgari Bolsonaru hukumatida Adliya va jamoat xavfsizligi vaziri bo‘lgan, hukumat uni hibsga olishni talab qilgan.
So‘nggi ma’lumotlarga ko‘ra, Braziliyada jami 400 kishi hibsga olingan.
Izoh (0)