Afg‘oniston BMT Bosh assambleyasining sentyabr oyida bo‘lib o‘tadigan 79-sessiyasida ishtirok eta olmaydi, chunki mamlakatning yangi hukumatiga hali BMTda o‘rin berilmagan. Bu haqda Qatardagi “Tolibon” siyosiy byurosi rahbari Suhayl Shahin ma’lum qildi.
Dekabr oyi boshida BMTning maxsus qo‘mitasi amaldagi afg‘on hukumatiga mamlakatning tashkilotdagi o‘rnini berish qarorini keyinga qoldirgan edi. Kobulning amaldagi rasmiylari qo‘mitaning bu qarorini noqonuniy deb hisoblagan.
“Biz ishtirok etishni xohlaymiz va bu bizning huquqimiz. BMTning vakolatlarni tekshiruvchi qo‘mitasidan Afg‘onistonning BMTdagi o‘rnini Afg‘oniston Islom Amirligi hukumatiga topshirishni talab qilamiz. Bu Afg‘onistondan xorij qo‘shinlari olib chiqib ketilganidan keyin ham sodir bo‘lmadi”, deydi Shahin.
2021-yil avgust oyi boshida “Tolibon” afg‘on hukumat kuchlariga qarshi hujumni kuchaytirgan, 15-avgust kuni Kobulga kirib kelgan hamda ertasi kuni urush yakunlanganini e’lon qilgan. Avgust oyining so‘nggi ikki haftasida Amerika harbiylari himoyasida bo‘lgan Kobul aeroportidan G‘arb davlatlari fuqarolari va ular bilan hamkorlik qilayotgan afg‘onlarni ommaviy evakuatsiya qilish amalga oshirilgan.
Avgust oxirida amerikalik harbiylar Kobul aeroportini tark etib, Afg‘onistondagi amerikalik harbiylarning qariyb 20 yillik faoliyatiga yakun yasagan.
Izoh (0)