Meksika prezidenti Klaudiya Sheynbaum AQSHning saylangan prezidenti Donald Trampning Meksika ko‘rfazini Amerika ko‘rfazi deb qayta nomlash niyati haqidagi so‘zlaridan keyin Amerikaga tarixiy nomni qaytarishni taklif qildi. Bu haqda “RIA Novosti” xabar berdi.
Tramp avvalroq Meksika ko‘rfazini Amerika ko‘rfazi deb qayta nomlashi, bu uning siyosatining bir qismi bo‘lishini ta’kidlagandi. U administratsiya ko‘rfaz nomini qachon o‘zgartirishini ochiqlamagan. Biroq bu haqda yaqin kelajakda e’lon qilinishini aytgan.
Vakillar palatasi a’zosi Marjori Teylor Grin esa shunga oid qonun loyihasi tayyorlagani va uni taqdim etishni rejalashtirgani bildirgan.
Sheynbaum ta’kidlashicha, “Meksika ko‘rfazi” nomi xalqaro institutlar tomonidan allaqachon tan olingan. Bunga javoban u butun qit’aga Meksika Amerikasi deb tarixiy nom berishni taklif qildi.
BMT va uning agentligi tomonidan Meksika ko‘rfazi nomining tan olinganligi aniq. Lekin nima uchun biz (Shimoliy Amerikani) Meksika Amerikasi deb atamaymiz? Juda chiroyli eshitiladi, shunday emasmi? Aslida, 1607-yildan, Apatsingan asos solinganidan beri, u Meksika Amerikasi bo‘lgan, degan Sheynbaum va qit’aning tarixiy xaritalarini ko‘rsatgan.
Sheynbaum administratsiyasi maslahatchisi Xose Alfonso Suares del Real ta’kidlashicha, Meksika qo‘ltig‘ining nomi XVI asrdan beri xalqaro miqyosda tan olingan bo‘lib, u AQSH davlatidan ham qadimiyroqdir.
Trampning tahdidlari
2024-yil dekabr oyining oxirida Donald Tramp bir necha bayonotlarida AQSHning Panama kanali va Grenlandiya ustidan nazoratni o‘rnatishi “Amerika milliy xavfsizligi” masalasi ekanini ta’kidlagan. 7-yanvarda o‘tkazilgan matbuot anjumanida u Panama kanali va Grenlandiyani qo‘lga kiritish uchun harbiy yoki iqtisodiy bosim o‘tkazish ehtimolini rad etmagan. Shuningdek, Tramp Kanadaga AQSH tarkibiga qo‘shilishni taklif qilgan.
Daniya hukumati dekabr oyida Grenlandiya mudofaasiga ajratiladigan mablag‘ni kamida 1,5 milliard dollarga oshirishini e’lon qildi. Bundan tashqari, qirollik o‘zining rasmiy gerbini o‘zgartirib, unda Grenlandiya va Farer orollari ramzlarini kattalashtirdi.
Izoh (0)