AQSHda prezidentlik saylovida g‘alaba qozongan Donald Tramp tomonidan taklif qilingan yangi bojlar global savdo tizimiga putur yetkazishi mumkin.
Xususan, bunday bojlar Amerika iqtisodiyotining muhim tarmog‘i bo‘lgan avtomobil sanoatiga jiddiy zarar yetkazish bilan tahdid qilmoqda, deb yozadi The Wall Street Journal.
Avvalroq Tramp Kanada va Meksikadan tovarlarga 25 foizlik, Xitoydan import qilinadigan mahsulotlarga esa 10 foizlik bojlar joriy etilishini eʼlon qilgan edi. Truth Social’da bergan bayonotida Tramp bu choralar noqonuniy migratsiya va narkotik vositalar, xususan, fentanil yetkazib berish to‘xtatilmaguncha o‘z kuchida qolishini ta’kidladi.
“Muammo shundaki, bunday strategiya xarajatsiz amalga oshirilmaydi va halokatli oqibatlarga olib kelishi mumkin. Keling, AQSH avtosanoatidan boshlaylik... Avtomobil butlovchi qismlari va xomashyo yig‘ish jarayonida Shimoliy Amerika chegaralarini bir necha marta kesib o‘tadi. Har bir chegarada bojlar 25 foiz bo‘lsa, bu narxlarni keskin oshiradi va Qo‘shma Shtatlarda ish joylarini yo‘qotishga olib keladi. Bundan tashqari, javob choralari xavfi mavjud”, deyiladi WSJ maqolasida.
Nashr, shuningdek, ushbu bojlarning kiritilishi Trampning birinchi muddatida imzolagan AQSH-Meksika-Kanada savdo bitimini (USMCA) buzishi mumkinligini ta’kidlaydi. Tramp avvalroq “AQSH tarixidagi eng yaxshi kelishuv” deb atagan kelishuv davlatning ishonchli savdo sherik sifatidagi obro‘sini yo‘q qilishi mumkin.
“Tramp bojlarni nafaqat vaqtinchalik muzokaralar uchun vosita, balki butun global savdo tizimini qayta qurish uchun dastak sifatida ko‘rishi ehtimoli bor”, deb qo‘shimcha qilinadi materialda.
WSJ ta’kidlashicha, bunday siyosat zarar keltirishi mumkin, ayniqsa, Qo‘shma Shtatlar Xitoy bilan qarama-qarshilikda ittifoqchilarning yordamiga umid qilsa.
Ittifoqchilarga bojlar joriy qilish AQSHni jahon sahnasida yanada yakkalab qo‘yish va Xitoyga xalqaro bozorlarda o‘z mavqeyini mustahkamlash uchun yangi imkoniyatlar ochish xavfini tug‘diradi, deyiladi WSJ materialida.
Izoh (0)