АҚШ президенти Жо Байден маъмурияти яқинда Украинага яна 500 миллион доллар миқдорида ҳарбий ёрдам пакети етказилишини эълон қилади.
Бу ҳақда Associated Press икки манбага таянган ҳолда хабар берди.
Маълумотларга кўра, ёрдам PDA (Presidential Drawdown Authority) механизми орқали ажратилади, бу эса Америка президентига фавқулодда вазият юзага келган тақдирда Конгресс рухсатисиз, фармон билан хорижий ҳамкорига қурол етказиб бериш имконини беради. Пентагоннинг юқори мартабали мулозимининг айтишича, мақсад қуролларни январь ойи охиригача Украинага топшириш.
АҚШ 9 январь куни Украинага кенг кўламли якуний ҳарбий ёрдам пакетини эълон қилиши режалаштирилган. Бу баёнот АҚШ мудофаа вазири Ллойд Остиннинг Германияга ташрифи чоғида айтилиши кутилмоқда, у Рамштейн авиабазасида Украинани қўллаб-қувватловчи 50 га яқин ҳамкор давлат вакиллари билан учрашади.
Аввалроқ Украина ташқи ишлар вазири Андрей Сибига Европа давлатлари ва АҚШни мамлакатни фаолроқ қўллаб-қувватлашга чақириб, ҳозирда бу борадаги сусткашлик ёмон оқибатларга олиб келиши мумкинлигидан огоҳлантирганди.
“Ҳозир Украинанинг шериклари учун чарчоқ ёки дам олиш вақти эмас”, деган вазир. Сибига тинчликка эришиш учун Украинани кўпроқ қўллаб-қувватлаш зарурлигини таъкидлаган.
Изоҳ (0)