Afg‘onistonda ISHID va “Al-Qoida” xalqaro terroristik tashkilotlari qaytadan faollashmoqda. Bu haqda The Telegraph nashrida chop etilgan maqolada qayd etilgan.
MI5 bosh direktori Ken Makkalum har ikki tashkilotning qayta tiklanishidan xavotir bildirib, ISHID Britaniyaga ham tahdid solishi mumkinligini maʼlum qilgan. AQSH Markaziy qo‘mondonligi rahbari Maykl Kurilla esa ISHID Suriya va Iroqda qaytadan kuchayib xorijda hujumlar uyushtirishga qodir ekani haqida ogohlantirgan.
2021-yilda “Tolibon” Afg‘oniston hokimiyatiga kelgandan so‘ng “Al-Qoida” mamlakatda qayta kuchaya boshlagan. Ushbu tashkilot 2001-yilgacha, yaʼni Afg‘onistonda eng faol bo‘lgan paytlarda ham hozirgi kabi ishlarni amalga oshira olmagan.
“Tolibon”ni kuzatib boruvchi BMT guruhining 2022-yil aprel oyidagi hisobotida, “Tolibon” “Al-Qoida” bilan “yaqinligicha qolayotgani”, “Al-Qoida” “Tolibon” qo‘li ostida xavfsiz boshpana va harakat erkinligini oshirganini maʼlum qilgan.
Afg‘onshunos olim Suhrob Bo‘ronov “Al-Qoida” Afg‘onistonning Panjsher vodiysida 9 ta o‘quv lageri va hattoki o‘q-dori omborlari qurishga erishganni yozmoqda.
Avgust oyida AQSHning uchuvchisiz samolyoti Kobulda “Al-Qoida” yetakchisi Ayman al-Zavohiriyni o‘ldirgan edi. Xabarlarda aytilishicha, Zavohiriy “Tolibon” yordamchisining (Haqqoniy tarmog‘i) uyida yashagan va “Al-Qoida”ning boshqa yetakchilari ham Afg‘onistonda boshpana topgani taxmin qilinadi. Birlashgan Millatlar Tashkilotining hisobotida ham “Al-Qoida” Afg‘onistondan yollash, o‘qitish va mablag‘ yig‘ish uchun 'do‘stona muhit' sifatida foydalanishi mumkinligi taʼkidlanadi. Afg‘oniston qarshilik kuchlarining aytishicha, “Al-Qoida” Panjsher vodiysida 9 ta o‘quv lageri va hattoki o‘q-dori omborlari qurishga erishgan”, deydi Suhrob Bo‘ronov.
Shuningdek, u “Tolibon” ISHID—Xuroson bo‘limi tomonidan chet ellik jangalarni yollashga to‘sqinlik qila olmayotganini qo‘shimcha qilgan.
ISHID—Xuroson bo‘limi “Tolibon”ning mamlakatdagi asosiy raqibi sifatida ko‘rilsa-da, uning faoliyatiga to‘liq barham bera olgani yo‘q. Natijada “Tolibon” kuchlari ISHID—Xuroson bo‘limi tomonidan chet ellik jangarilarni yollashga, hajmi, ko‘lami va geografik ambitsiyalarining ortishiga to‘sqinlik qila olmayapti”, deya yozgan siyosatshunos.
Tahlilchilar fikricha, guruhning faollashuviga 2022-yil oxirida Xitoy, Pokiston va Rossiyaning Kobuldagi elchixonalariga uyushtirgan hujumlarini misol qilib keltirishning o‘zi kifoya. BMT monitoring guruhiga ko‘ra, bu hujum guruhning mavqeini oshirgan va o‘zini “Islomiy davlat” deb eʼlon qilgan tashkilotni guruh uchun qo‘shimcha millionlab dollar mablag‘ ajratilishiga olib kelgan.
ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)