“Tolibon” amerikalik mahbus Rayan Korbettni “Al-Qoida” rahbari Usama bin Ladenning sobiq yordamchisi Muhammad Rahim al-Afg‘oniyga alishishga harakat qilmoqda. Bu haqda Sputnik Afg‘oniston xabar berdi.
Rayan Korbett 40 yoshli AQSH fuqarosi bo‘lib, 15 oydan beri “Tolibon” nazoratidagi qamoqxonada qolmoqda. U 2022-yil yozida, “Tolibon” Afg‘onistonda nazorat o‘rnatganidan roppa-rosa bir yil o‘tib, Afg‘oniston shimoli-g‘arbidagi Shibirg‘on shahriga nemis hamkasbi bilan safar qilgan.
“Tolibon” Korbettni nasroniylikni targ‘ib qilishda ayblagan, amerikalik mahbusning oilasi buni rad etgan. Sentyabr oyidan beri AQSH Davlat departamenti Korbettni ozod qilishga harakat qilmoqda. Ammo hozirgacha bu muvaffaqiyatsiz bo‘ldi.
Biroq, Bayden ma’muriyatining yuqori martabali mulozimiga ko‘ra, “Tolibon” Amerikadan bu borada imkoni bo‘lmagan narsani amalga oshirishini xohlaydi. Jumladan, amerikalik mahbus evaziga 2008-yildan beri Guantanamo qamoqxonasida saqlanayotgan Afg‘oniston fuqarosi Muhammad Rahim al-Afg‘oniyni ozod qilishni talab qilmoqda.
Korbettning rafiqasi bu xabarni tasdiqlagan. AQSH fuqarosi bir kishilik kamerada va og‘ir ahvolda ekani aytilmoqda.
Izoh (0)