Kursk viloyatida Rossiya armiyasi tarkibida jang qilayotgan shimoliy koreyalik harbiylar Yangi yil kechasi mast holatda edi. Bu haqda Ukraina razvedkasi xabar berdi.
Yangi yil kechasida KXDR askarlari orasida spirtli ichimliklarni iste’mol qilish holatlari kuzatilgan. 31-dekabr va 1-yanvar kunlari ular janglarda qatnashgan.
Yo‘qotishlar o‘rnini to‘ldirish va pozitsiyalarni kuchaytirish uchun rus qo‘mondonlari KXDRning yangi harbiy qo‘shinlarini oldinga o‘tkazmoqda. 31-dekabr va 1-yanvar kunlari Shimoliy Koreya askarlari Kursk viloyatining Ulanok, Fanasyevka, Cherkasskaya Uonopolka aholi punktlari yaqinidagi pozitsiyalarga o‘tkazildi, deyiladi razvedka xabarida.
Razvedkaga ko‘ra, KXDR harbiylari orasida yo‘qotishlar ko‘p, biroq yuqori qo‘mondonlikka yo‘qotishlar haqida yolg‘on ma’lumot berilmoqda.
Shimoliy Koreya askarlarining jangovar ruhi tushib ketgan. Ular doimiy ravishda Ukrainaga qarshi urushda KXDR armiyasining ishtiroki “katta ahamiyatga ega”ligi haqidagi Rossiya armiya tashviqoti bilan “ishlanmoqda”. Yangi yil kechasida Shimoliy Koreya askarlari, shu jumladan, jangovar harakatlarga jalb qilingan askarlar o‘rtasida spirtli ichimliklarni iste’mol qilish holatlari qayd etildi, deyiladi xabarda.
Oq uyning strategik aloqalar bo‘yicha koordinatori Jon Kirbi bir hafta ichida KXDR ming askarini yo‘qotgani, o‘z joniga qasd qilish holatlari haqida ham ma’lumotlar borligini aytgandi.
Zelenskiy Rossiya armiyasi safidagi shimoliy koreyaliklar haqida
19-dekabr kuni Ukraina prezidenti Vladimir Zelenskiy Bryusselda o‘tkazilgan matbuot anjumanida jurnalistlar savollariga javob berar ekan, “Rossiya Shimoliy Koreya harbiylarini o‘z fuqarolari sifatida niqoblaydi, halok bo‘lgan askarlarning yuzlarini yoqib yuboradi”, degandi. Zelenskiy hozircha janglarda 12 ming atrofida Shimoliy Koreya harbiysi qatnashayotganini aytgandi.
Hozircha 12 mingdan ortig‘ini ko‘ryapmiz. Ular harbiy xizmatchilarimiz qayd etgan miqdordan ko‘proq bo‘ladimi yo‘qmi, bilmayman, ko‘ramiz. Asirlarga kelsak, hozircha yo‘q. Lekin bizda Shimoliy Koreyaning halok bo‘lgan askarlari tasvirlangan video va fotosuratlar bor. Ularni deyarli barchasini Rossiya pasportlari bilan topishmoqda, degan edi Ukraina prezidenti.
Izoh (0)