Ukraina armiyasi safida jang qilishni rejalashtirgan Rossiya fuqarosi 10 yilga ozodlikdan mahrum qilindi. Bu haqda The Moscow Times nashri xabar berdi.
Rossiya sudi 25-aprel kuni davlatga xiyonat va terrorizmda ayblangan sibirlik fuqaroni Ukraina uchun jang qilayotgan Rossiya bo‘linmalariga qo‘shilish rejalarida ayblanib, uzoq muddat qamoq jazosiga hukm qilgan. Ayblov eʼlon qilish uchun tegishli barcha dalillar ko‘rsatilgan.
Manbada aytilishicha, 26 yoshli fuqaro huquq-tartibot idoralari tomonidan Kemerovo viloyati hududidan Ukrainaga jo‘nab ketayotgan vaqtida qo‘lga olingan.
“TASS” agentligining xabar berishicha, Kiyev uchun kurashayotgan, Kremlga qarshi bo‘lgan rus bo‘linmalari “Rossiya erkinligi legioni” tashkilotini taʼsis etishgan. Ushbu tashkilot ijtimoiy tarmoqlarda o‘z ramzlarini eʼlon qilib, Ukraina tomonida turib jang qilishni istagan barcha ruslarni o‘z safiga chaqirgan.
Moskva ushbu tashkilotni terrorchi sifatida taqiqlagan. Tashkilot bilan har qanday aloqa uchun jinoiy javobgarlik belgilangan.
Rossiya tomonidan bosib olingan Ukraina janubidagi Zaporojye viloyatida Moskva tomonidan o‘rnatilgan hukumat 25-aprel kuni mahalliy fuqaroni Ukraina foydasiga josuslik qilgani uchun 11 yilga ozodlikdan mahrum etgan edi. “TASS” xabariga ko‘ra, u Rossiya qo‘shinlarining harakati va yo‘nalishlari to‘g‘risida maʼlumot to‘plagan va Ukraina tomoniga uzatgan.
Izoh (0)