“Milliy tiklanish” partiyasi raisi, deputat Alisher Qodirov Rossiya havo hududi xavfsizmi, deya savol qo‘ymoqda.
Uning ta’kidlashicha, Uzbekistan Airways birinchi o‘rinda vatandoshlar xavfsizligi haqida o‘ylashi kerak.
“Milliy tiklanish” fraksiyasi bu mavzuda Transport vazirligi va kompaniyaga asosli tushuntirish berish so‘rovini yuboradi, deydi Alisher Qodirov.
Avvalroq Rossiya Qozog‘istonda qulagan samolyot halokatiga Ukraina dronlari va quyuq tumanni sabab qilib ko‘rsatgandi. Keyinroq Azerbaijan Airlines (AZAL) kompaniyasi Qozog‘istonning Oqtov shahri yaqinida qulagan samolyotning halokatiga “tashqi jismoniy va texnik ta’sir” sabab bo‘lganini ma’lum qilgandi.
Reuters nashri mazkur samolyot Rossiya havo hujumidan mudofaa tizimi tomonidan urib tushirilgani haqida xabar bergan edi.
Manbalarga ko‘ra, dastlabki ma’lumotlar samolyot Rossiyaning “Pansir-S” zenit-raketa tizimi tomonidan hujumga uchragan. Layner aloqasi esa Grozniy yaqinida radioelektron kurash tizimlari tomonidan “falaj qilingan”.
“Hech kim buni ataylab qilingan deb ta’kidlamaydi. Biroq aniqlangan faktlarni hisobga olgan holda, Boku Rossiya tomoni Ozarbayjon samolyotini urib tushirganini tan olishini kutmoqda”, dedi manba.
Ozarbayjon deputati ham aviahalokatga Rossiya aybdorligini aytmoqda
“Samolyot Rossiya hududida, Grozniy osmonida o‘qqa tutilgan. Buni inkor etib bo‘lmaydi... Buni sodir etganlar jinoiy javobgarlikka tortilishi, tovon puli to‘lanishi kerak”, dedi deputat Rasim Musabekov.
Deputatning ta’kidlashicha, Rossiyada kimdir “izlarni yashirishga” urinmoqda, ammo agar uzr so‘ralmasa, aybdorlar javobgarlikka tortilmasa va tovon puli to‘lanmasa, Boku va Moskva o‘rtasidagi munosabatlar “boshqa darajaga o‘tadi”.
Ozarbayjon samolyotining halokatiga Rossiya raketasi sabab bo‘lgan — Euronews
Euronews ham Ozarbayjon hukumatidagi manbalarga asoslanib, Rossiya raketasi Azerbaijan Airlines samolyotining halokatga uchrashiga sabab bo‘lgani haqida xabar bergan. Dastlabki ma’lumotlariga ko‘ra, Grozniy ustidan uchib borayotgan vaqtda samolyotga havo mudofaa tizimi bilan zarba berilgan. Zenit raketa havodagi samolyot yonida portlab, metall parchalar ekipaj va yo‘lovchilarni jarohatlagan.
Biroq uchuvchilarning favqulodda qo‘nish haqidagi so‘rovlariga qaramay, Rossiyaning birorta aeroportiga qo‘nishga ruxsat bermagan. Shundan so‘ng ekipajga Kaspiy dengizi orqali Qozog‘istonning Oqtov shahri tomon uchish buyurilgan. Rossiya armiyasi tomonidan qo‘llanilgan radioto‘lqinli qurollar samolyotning GPS navigatsiya tizimiga zarar yetkazgani aytilmoqda.
Boku—Grozniy reysining vaqti Ukraina armiyasi tomonidan Chechenistonga dron zarbalari berilgan vaqtga to‘g‘ri keldi. Tarmoqlarda paydo bo‘lgan video J2-8243 reysi Grozniyga uchayotgan vaqti Chechenistonda olingan bo‘lib, unda Ukraina droni “Pansir-S” tizimi yordami bilan urib tushirilishi aks etgan.
Qulagan samolyotda teshiklar aniqlangan
Qulagan samolyot ko‘zdan kechirilganda teshiklar aniqlangan. Shunga asoslanib, ayrim manbalar samolyotni Chechenistonga dron hujumini qaytargan havo hujumidan mudofaa tizimi o‘qqa tutgan bo‘lishi mumkinligini yozgan.
Izoh (0)