Rossiya armiyasi safida jang qilish uchun yuborilayotgan Shimoliy Koreya harbiylari dastlab Kursk viloyatiga joylashtirilishi mumkin. Bu haqda Ukraina armiyasi zaxiradagilar kengashi raisi Ivan Timochko ma’lum qildi.
Timochko KXDR harbiylari uzoq vaqtdan beri Rossiya armiyasi tarkibida Ukrainaga qarshi jang olib borayotganini aytdi. Dastlab, ular Koreya raketalarining operatorlari bo‘lib, KXDR snaryadlarini rus artilleriyasi va muhandislariga o‘rgatgan.
“Bu harbiylardan jang maydonlarining ko‘p qismida faol foydalanilayotganini ko‘ryapmiz. Masala ularning soni va bu “oshkor bo‘lgan” 10-20 ming kishilik bo‘linmalar qayerda birinchi bor qo‘llanilishida. Bu aslida juda katta raqam.
Ehtimol, ularni Kursk viloyatidagi jangovar harakatlarda, hech bo‘lmaganda, ma’lum vaqt moslashishlari uchun qo‘llashga harakat qilishadi. Bu esa, har doimgidek, Rossiyaga siyosiy manyovr qilish imkoniyatini beradi. chunki ular KXDR qo‘shinlari to‘g‘ridan to‘g‘ri Rossiya hududida harbiy amaliyotlar o‘tkazishga yordam beruvchi ittifoqchilar ekanini aytishi mumkin”, deya tushuntirdi Timochko.
Shu bilan birga, “buryat batalyoni” deb ataladigan taktika boshqacha bo‘ladi. Bunga jalb qilingan Shimoliy Koreya harbiylariga Rossiya pasportlari beriladi.
“Hozir ularning samaradorligiga qarab, keyinchalik ulardan Ukraina hududida jangovar harakatlar uchun foydalanish ehtimoli katta”, dedi Timochko.
OAV Shimoliy Koreya hukumati Ukrainaga qarshi urush uchun Rossiyaga o‘zining maxsus otryadi — KXDR maxsus operatsiyalar kuchlarini yuborganini ma’lum qilgan edi. Ukraina prezidenti Vladimir Zelenskiy Shimoliy Koreyadan urushga jalb qilinishi mumkin bo‘lgan 10 ming harbiy haqida gapirgan.
Ukraina razvedkasi rahbari Budanovning ta’kidlashicha, hozirda 11 mingga yaqin Shimoliy Koreya piyodalari Rossiya sharqida jangovar tayyorgarlikdan o‘tmoqda va 1-noyabrda jangovar pozitsiyalarga yuboriladi.
Izoh (0)