Rossiya Ukrainaga qarshi urushda ishtirok etayotgan Shimoliy Koreya harbiylarining frontdagi mavjudligini yashirish uchun ularga soxta guvohnomalar bermoqda. Bu haqda Ukraina armiyasining Maxsus operatsiyalar kuchlari xabar berdi.
Ma’lumotni Kursk viloyatidagi janglarda halok bo‘lgan KXDR askarlariga berilgan harbiy guvohnomalar tasdiqlaydi. Hujjatlarda ularning egalari Tiva Respublikasi fuqarolari ekani ko‘rsatilgan. Biroq shaxsiy imzolar koreys tilida qo‘yilgan. Shu tariqa Shimoliy Koreya harbiylari soxta shaxsiyat ostida janglarda qatnashgan.
Ushbu harbiy guvohnomalarda muhrlar, fotosuratlar yo‘q, otasining ismi rus uslubida berilgan, tug‘ilgan joyi esa Tiva Respublikasi deb ko‘rsatilgan, deyiladi xabarda.
Ukraina armiyasi rossiyaliklar bunday choralarni “jang maydonidagi yo‘qotishlarini va xorijiy ishtirokni yashirish uchun” qo‘llayotganini ta’kidlamoqda.
Zelenskiy Rossiya armiyasi safidagi shimoliy koreyaliklar haqida
19-dekabr kuni Ukraina prezidenti Vladimir Zelenskiy Bryusselda o‘tkazilgan matbuot anjumanida jurnalistlar savollariga javob berar ekan, “Rossiya Shimoliy Koreya harbiylarini o‘z fuqarolari sifatida niqoblaydi, halok bo‘lgan askarlarning yuzlarini yoqib yuboradi”, degandi. Zelenskiy hozircha janglarda 12 ming atrofida Shimoliy Koreya harbiysi qatnashayotganini aytgandi.
Hozircha 12 mingdan ortig‘ini ko‘ryapmiz. Ular harbiy xizmatchilarimiz qayd etgan miqdordan ko‘proq bo‘ladimi yo‘qmi, bilmayman, ko‘ramiz. Asirlarga kelsak, hozircha yo‘q. Lekin bizda Shimoliy Koreyaning halok bo‘lgan askarlari tasvirlangan video va fotosuratlar bor. Ularni deyarli barchasini Rossiya pasportlari bilan topishmoqda, degan edi Ukraina prezidenti.
Izoh (0)