Rossiya va Ozarbayjon huquq-tartibot idoralariga Qozog‘iston Jinoyat protsessual kodeksiga muvofiq jinoyat ishi bo‘yicha tergovda ishtirok etishga ruxsat etilmaydi. Bu haqda Qozog‘iston bosh vaziri o‘rinbosari Kanat Bozumbayev Oqtovda bo‘lib o‘tgan brifingda ma’lum qilgan.
“Rossiya va Ozarbayjon huquq-tartibot idoralari kriminalistik tergovda ishtirok eta olmaydi, biroq ularga aviahalokatni tergov qilishga ruxsat beriladi”, dedi u.
25-dekabr kuni Bokudan Grozniyga uchayotgan Azerbaijan Airlines kompaniyasining Embraer samolyoti Qozog‘istonning Oqtov shahri yaqinida halokatga uchragan edi. Samolyot bortida 62 nafar yo‘lovchi, jumladan, 37 nafar Ozarbayjon, 16 nafar Rossiya, 6 nafar Qozog‘iston va 3 nafar Qirg‘iziston fuqarosi hamda besh nafar ekipaj a’zosi bo‘lgan. Hodisa oqibatida 38 nafar yo‘lovchi halok bo‘ldi, 29 kishi, jumladan, uch nafar bola tirik qoldi.
Prezident Ilhom Aliyevning farmoyishiga ko‘ra, Ozarbayjonda 2024-yil 26-dekabr kuni aviahalokatda halok bo‘lganlar xotirasiga motam e’lon qilindi.
Euronews telekanali Ozarbayjon hukumatidagi manbalariga tayanib samolyotining halokatiga Rossiya raketasi sabab bo‘lganini ma’lum qildi.
Dastlabki ma’lumotlariga ko‘ra, Grozniy ustidan uchib borayotgan vaqtda samolyotga havo mudofaa tizimi bilan zarba berilgan. Zenit raketa havodagi samolyot yonida portlab, metall parchalar ekipaj va yo‘lovchilarni jarohatlagan. Biroq uchuvchilarning favqulodda qo‘nish haqidagi so‘rovlariga qaramay, Rossiyaning birorta aeroportiga qo‘nishga ruxsat bermagan. Shundan so‘ng ekipajga Kaspiy dengizi orqali Qozog‘istonning Oqtov shahri tomon uchish buyurilgan.
Ma‘lum qilinishicha, Rossiya armiyasi tomonidan qo‘llanilgan radioto‘lqinli qurollar samolyotning GPS navigatsiya tizimiga zarar yetkazgan.
Raketa Pansir-S havo mudofaa tizimidan uchirilgan, deb xabar bermoqda AnewZ nashri Ozarbayjon hukumatidagi manbalariga tayanib.
Izoh (0)