Rossiyaning Krasnodar o‘lkasida aniqlangan “Vagner” qabristoni kengaymoqda. Ikki oy ichida qabrlar soni yetti barobar oshdi, deya xabar berdi The New York Times.
Nashr jurnalistlari 24-yanvar kungi sun‘iy yo‘ldosh suratlariga asoslanib, qabristonda allaqachon 170 ta qabr borligini aniqladi. Bundan tashqari, yana yuzlab yollanma askarlarning jasadi yaqin atrofdagi ibodatxonada joylashgani qayd etildi.
Molkino qishlog‘ida qabriston borligi haqida ilk bor dekabr oyida Rossiya harbiy-havo kuchlarining sobiq zobiti Vitaliy Votanovskiy xabar bergandi. “Vagner” asoschi Yevgeniy Prigojin qabriston yollanma askarlarni dafn qilishga mo‘ljallanganini tasdiqlagan. Votanovskiyning so‘zlariga ko‘ra, qabristonda kimsasiz yollanma askarlarning jasadlari ko‘milgan. Mahalliy aholi ularning ko‘pchiligi yoqib yuborilganini aytmoqda.
Jurnalistlar Prigojinning qabristondan bir necha kilometr uzoqlikda joylashgan Vagner ibodatxonasiga tashrifi videosini ham tahlil qilgan. Bu yerda kuydirilgan qoldiqlarni dafn qilish uchun xos qora devorlar qatorlari mavjud. Nashr devorlarning umumiy soni 21 ta ekani, ularning har birida 42 ta qator borligini aytdi, ya'ni cherkovda yuzlab odamlar dafn etilgan bo‘lishi mumkin.
Ukrainaga qarshi urushda “Vagner”ning harakatlari
“Vagner” guruhi yollanma askarlardan iborat bo‘lib, urush o‘choqlarida qatnashadi. Masalan, ular Baxmut qal’asi uchun janglarda, shuningdek Soledarda qayd etilgan. Yollanma askarlar katta yo‘qotishlarga duch kelmoqda, shuning uchun ular o‘z saflariga mahbuslarni jalb qila boshlagan.
Yevgeniy Prigojinning shaxsiy armiyasi Ukrainadagi urushda 40 mingga yaqin yollangan mahkumlarni yo‘qotgani aytilgan. 25-yanvar holatiga ko‘ra, Rossiya armiyasi shaxsiy tarkibining umumiy yo‘qotishi 123 080 kishini tashkil qiladi.
Mavzuga doir:
Izoh (0)