Pokiston Ichki ishlar vazirligi “Tolibon” rasmiylariga murojaat qilib, “Tahriki Tolibon” guruhi terrorchilarini Islomobodga topshirishni so‘ragan. Bu haqda Pokiston ichki ishlar vaziri Mohsin Naqvi bergan maʼlumotga asoslanib, Hasht-e Subh Daily nashri xabar berdi.
Pokiston rasmiylari mamlakatning Xayber Paxtunxva viloyatida 5 nafar xitoylik halok bo‘lishiga olib kelgan terakt “Tahriki Tolibon” tomonidan uyushtirilganiga dalillar borligini maʼlum qilgan. Bu maʼlumotni rasman Pokiston ichki ishlar vaziri Mohsin Naqvi tasdiqlagan.
Biz “Tolibon”dan “Tahriki Tolibon” yetakchilarini, jumladan, uning rahbari Nuruli Mahsudni hibsga olishlarini va ikki davlat o‘rtasidagi do‘stona munosabatlarni saqlab qolish uchun ularni Pokistonga topshirishlarini so‘raymiz, — degan Islomobod hukumatining ichki ishlar vaziri.
Islomoboddagi rasmiylarga ko‘ra, Pokiston “Tolibon” bilan bu masalani muhokama qilgan. Ulardan bu guruhga qarshi chora ko‘rishni so‘ragan. Ammo “Tolibon” hozircha ijobiy javob qaytarmagan.
Pokiston chegara hududlarda xavf kuchayganini bildirgan. “Tolibon” chegara nazoratini yaxshi tashkil eta olmaganidan foydalangan radikal guruhlar Pokistonga tahdid keltirayotgani taʼkidlangan.
Afg‘onistondagi ayrim mahalliy manbalariga qaraganda, Pokiston daʼvo qilayotgan “Tahriki Tolibon” aʼzolari “Tolibon” tomonidan hibsga olingan. Kobul terrorchilar tomonidan Pokistonda, Xayber Paxtunxvada sodir etilgan, 5 nafar Xitoy fuqarosi o‘limiga olib kelgan teraktni qoralashini yana bir bor taʼkidlagan.
Izoh (0)