Amerikalik yozuvchi Jorj R.R.Martinning “Muz va olov qo‘shig‘i” asari asosida suratga olingan “Taxtlar o‘yini” filmi ilk bor 13 yil avval HBO telekanalida namoyish etilgan va kino olamini butunlay o‘zgartirib yuborgan edi. Ajdarlar, vayron bo‘lgan qal’alar va ajoyib aktyorlar jamoasidan iborat hikoyaning yakuni 2019-yilda bo‘lib o‘tdi. Uning finali muxlislarda ko‘plab savollar qoldirdi. Quyida serialda bosh qahramonni ijro etgan mashhur aktyorlarning taqdiri qanday kechgani haqida ma’lumot beramiz.
1. Emiliya Klark — Deyeneris Targaryen
Emiliya Klark loyihaning final syujetidan norozi bo‘lgan. Ayniqsa, u qahramoni Deyenerisning Vesteros malikasi bo‘la olmaganidan qattiq xafa bo‘lgan. Loyiha ustida ishlar tugaganidan so‘ng, ajdarlar onasi “Ikki kishilik Rojdestvo”, “Ideal ayol” kabi romantik komediyalarda suratga tushdi.
Ma’lumot uchun, “Taxtlar o‘yini” serialining birinchi va ikkinchi fasllarini suratga olish paytida Emiliya bosh miyasida jarrohlik amaliyoti o‘tkazilgan, shu sababli aktyorlar tarkibidan chiqarilishi mumkinligidan qo‘rqqan. Unga 2011-yilda miya anevrizmasi — bosh miya arteriyasining patologik lokal kengayishi tashxisi qo‘yilgan. O‘sha paytda aktrisa endigina 24 yoshda edi. Operatsiyadan so‘ng Emiliyaga afaziya — nutqni yo‘qotish tashxisi qo‘yildi. Muvaffaqiyatli o‘tgan operatsiyadan so‘ng aktrisa bir oy ichida o‘ziga kela boshlagan va roliga qaytgan.
2. Kit Harington — Jon Snou
Jon Snou roli Kit Haringtonga katta mashhurlik keltirdi, ammo aktyor bunday shon-shuhratga tayyor emas edi. Tasvirga olish ishlari tugagach, aktyor bir muddat tushkunlikka tushib, spirtli ichimliklarga berilib ketdi. Uni serialda Igritt rolini o‘ynagan Rouz Lesli qo‘llab-quvvatladi. Er-xotin hozirda ikki farzand tarbiyasi bilan band.
Shundan so‘ng aktyor o‘z kasbiga qaytib, ishga sho‘ng‘ib ketdi. 2023-yilda “Mitti Rubi” qo‘rqinchli filmida va “249-raqam” trillerda suratga tushdi. Yaqinda Harington “Oilaviy reja” komediyasining ikkinchi qismida rol o‘ynadi.
3. Meysi Uilyams — Arya Stark
Meysi Uilyams ham kinodagi faoliyatini davom ettirmoqda. U “Ikki haftada ulgurish”, “To‘pponcha” teleseriallarida, shuningdek, “New look: uslublar inqilobi” biografik filmida ishtirok etdi. Arya Stark rolini ijro etgan aktrisa hali oila qurmagan.
4. Sofi Tyorner — Sansa Stark
“Taxtlar o‘yini” muvaffaqiyatidan so‘ng Sofi Tyorner xuddi shunday omadli va qiziqarli loyihalarda ishtirok eta olmadi. U “G‘aroyib odamlar: qora Feniks” ilmiy-fantastik filmida, “Omon qolish” va “Zin” seriallarida rol o‘ynadi. 2024-yilda Sofi ishtirokidagi ko‘p qismli kriminal drama ham suratga olindi, unda aktrisa britaniyalik jinoyatchi va daho Joan Hannington obrazini gavdalantirdi.
Bir necha yil avval Tyorner xonanda Jo Jonasga turmushga chiqdi. Ularning Uilla va Delfina ismli ikki qizi tug‘ildi, biroq to‘ydan uch yil o‘tgach er-xotin ajrashdi.
5. Ayzek Hempsted-Rayt — Bran Stark
“Taxtlar o‘yini” filmidagi mashhurlikdan so‘ng Ayzek universitetga o‘qishga kirdi va aktyorlik ishini davom ettirdi. So‘nggi marta u “Voyadjerlar avlodi” va “Moviy Mavrikiy” kabi loyihalarda suratga tushdi.
6. Lena Hidi — Serseya Lannister
Shafqatsiz va qasoskor malika roli uchun besh karra Emmi mukofotiga nomzod bo‘lgan Lena Hidi filmlarda rol o‘ynashni davom ettirdi. Bir necha yil avval esa u o‘zini rejissyor va prodyuser sifatida ham sinab ko‘rdi. 2022-yilda hamkasbi Mark Menchakaga turmushga chiqdi.
7. Jek Glison — Joffri Barateon
“Taxtlar o‘yini” finalidan so‘ng Jek Glison aktyorlik faoliyatini to‘xtatib, teatr sohasiga qiziqa boshladi. Biroq 2022-yilda u Liam Nison bilan “Begunohlar va gunohkorlar mamlakati” da ishtirok etib, avvalgi kasbiga qaytdi.
2024-yil oktyabr oyida Jek Glison “Ginnes uyi” serialida suratga tushdi. Aktyor oilali, farzandlari bor, ammo u shaxsiy hayoti tafsilotlari bilan hech qachon bo‘lishmaydi.
8. Piter Dinkleyj — Tirion Lannister
Piter rolga kastingsiz taklif qilingan kam sonli aktyorlardan biridir. U Tirion Lannister personajini maromiga yetkazib o‘ynay olgan. “Taxtlar o‘yini” finalidan so‘ng “Firibgar”, “Sirano”, “Transformerlar: Zverobotlar tirilishi” kabi loyihalarida ishtirok etishga muvaffaq bo‘ldi. Dinkleyj deyarli 20 yildan beri Erika Shmidt bilan birga. Er-xotin hozirda ikki farzandni tarbiyalamoqda.
Piter Dinkleyjning bo‘yi tug‘ma axondroplaziya tufayli 135 santimetrni tashkil etadi. Oilada bu kasallik faqat Piterda kuzatilgan. U o‘z faoliyatini 26 yoshida boshlagan. 2011-yilga kelib, “Elf”, “Narniya yilnomalari: Shahzoda Kaspian” va boshqa ko‘plab filmlarda suratga tushishga ulgurgan taniqli aktyor bo‘lgan.
Izoh (0)