Afsuski, hamma ham aktyorning shaxsiyatini ekrandagi obrazidan ajrata olmaydi. Shu sababli yovuz va yaramas rollarni ijro etgan aktyorlar real hayotda shafqatsiz tanqidga duchor bo‘lishadi. Ba’zilari esa bunday nafrat to‘lqiniga bardosh berolmay, kasblarini tark etishga majbur bo‘ladi.
Jek Glison — Joffri Barateon
“Taxtlar o‘yini” serialining to‘rt mavsumi davomida Jek Glison hokimiyatga tashna sadist Joffri Barateon rolini shunday mahorat bilan ijro etdiki, u butun televideniye tarixidagi eng nafratlanilgan yovuzlardan biriga aylandi. Muxlislar Glisonni Joffridan ajrata olmaganlari sababli iste’dodli aktyor internet orqali hujumlarga va tahdidli xatlarga duchor bo‘ldi. Bu, chamasi, Glisonga qattiq ta’sir ko‘rsatdi, chunki serialning 2014-yildagi so‘nggi epizodidan ko‘p o‘tmay, u aktyorlik faoliyatini tark etishini e’lon qildi.
Tomas F. Uilson — Biff Tannen
Tomas F. Uilson Maykl J. Foks bilan birga 80-yillardagi “Kelajakka qaytib” trilogiyasida rol o‘ynaganida keng shuhrat qozondi, bu esa ba’zi muxlislarni Uilsonga salbiy munosabatda bo‘lishga majbur qildi. Aktyor bir rolning asiriga aylangani va uning obro‘si aktyordan oldinda ekanini tan olishga majbur bo‘ldi.
“Tomoshabinlarda aynan men filmdagi Maykl J. Foksga qo‘pol munosabatda bo‘lgan dahshatli odam ekanligim haqida taassurot paydo bo‘ldi”, deydi Tomas.
Lina Hidi — Serseya Lannister
“Taxtlar o‘yini” serialidagi Serseya Lannister roli bilan tanilgan Lina Hidiga ham oson kechmadi. Uning qahramoni kinematografiya tarixidagi eng yomon ko‘rilgan qahramonlardan biri bo‘lib, bu aktrisaning o‘ziga ham ta’sir qilmasligi mumkin emasdi.
2012-yilda Hidi San-Diyegoda bo‘lib o‘tgan Comic-Con festivalida muxlislar uni shunchaki e’tiborsiz qoldirishganini aytdi:
“Serialning eng sevimli qahramonlari bo‘lgan Piter Dinklej va Emiliya Klark o‘rtasida o‘tirgandim. Menga deyarli e’tibor berishmasdi. Odamlar Pitdan dastxat olish uchun kitoblar berishar va men ularni la’natlamoqchi bo‘lgandek mendan nari ketishardi”.
Jeffri Din Morgan — Nigan
Jeffri Din Morgan ham “Murdalar” serialidagi roli tufayli ekrandagi eng yomon qahramonlardan biriga aylandi. U ham onlayn, ham shaxsan muxlislar g‘azabiga duch kela boshladi va filmdagi hamkasbi Norman Ridus bilan birgaligida uni notanish keksa ayol yomon so‘zlar bilan so‘kkanini eslaydi:
Biz kun bo‘yi mototsiklda sayr qildik, shahar chetiga kelib qoldik va qahva ichish uchun to‘xtadik. Yoshi 80 larda bo‘lgan bir ayol mashinamiz yoniga kelib, menga o‘rta barmog‘ini ko‘rsatdi va “Jin ursin seni” deb so‘kdi.
Izoh (0)