Kinodagi roli uchun bemaza narsalarni tatib ko‘rishga majbur bo‘lgan aktyorlar

Ko‘pincha film va teleseriallardagi aktyorlar kadrning o‘zida ovqatlanishadi, chunki syujet shuni talab qiladi. Ba’zida ovqat va ichimliklar unchalik yoqimli bo‘lmaydi va hatto jirkanch bo‘lib chiqadi, ba’zida mazali bo‘lishi ham mumkin. 

Bemaza: Emiliya Klark — “Taxtlar o‘yini” (2011–2019)

Kult serialning birinchi mavsumida Deyeneris Targaryen ayg‘irning yuragini yeyishi kerak edi. Albatta, qahramon rolini ijro etgan Emiliya Klark uchun u muzlatilgan jemdan tayyorlab beriladi. Ammo baribir, aktrisaning so‘zlariga ko‘ra, “u oqartiruvchi modda va xom makaronga o‘xshardi”. Bundan tashqari, sahna ishonarli chiqishi uchun u ushbu soxta “yuraklardan” 28 tasini yeyishi kerak edi.

“Ular menga juda jirkanch taom berishgani juda yaxshi bo‘ldi, chunki hech qanday maxsus aktyorlik mahorati talab qilinmadi. Yaxshiyamki, ular qayt qilishim uchun chelak ham berishdi”, deydi Emiliya.

Bemaza: Endi Serkis — “Uzuklar hukmdori: Qirolning qaytishi” (2003)

“Uzuklar hukmdori”ning uchinchi qismida Smeagol Gollumga aylanib, xom baliqni yeydi. Baliq jelatindan tayyorlangan, ammo Smeagol rolini o‘ynagan Endi Serkis uni xom baliqdanam jirkanchroq deb hisoblaydi. “Men tishlashim kerak bo‘lgan bir nechta jelatin maketlarini tayyorlashdi. Lekin undan ko‘ra xom baliq yaxshiroq edi”, deydi aktyor.

Bemaza: Denni DeVito — “Betmenning qaytishi” (1992)

Tim Byorton filmida Pingvin jinoyat qilishdan bo‘sh vaqtlarida yangi baliq iste’mol qilishni xush ko‘radi. Yovuz qahramon rolini o‘ynagan aktyor Denni DeVito ishonarli chiqishi uchun kerakli sahnalarda haqiqiy xom baliq iste’mol qilishga qaror qiladi. U o‘z qahramonini chinakam jirkanch bo‘lishini va boshqa aktyorlar ham shunga yarasha munosabatda bo‘lishini xohlardi. Filmda personaj baliqni jirkanch tarzda yeganida boshqa ishtirokchilarning reaksiyalari yuz foiz haqiqiy bo‘lgan.

Taxminlarga ko‘ra, Mushuk-ayol rolini o‘ynagan Mishel Pfayfer pingvinga soxta noz-karashma qilgan sahnada juda qiynalgan, chunki Dennidan xom baliq hidi anqib turgan.

Bemaza: Chxve Min Sik — “Oldboy” (2003)

Mashhur koreys trillerining bir epizodida bosh qahramon tirik sakkizoyoqni yeydi. Qahramon Chxve Min Sik vegetarian va buddist bo‘lishiga qaramay, to‘rtta tirik sakkizoyoq yeydi — epizod bir necha marta suratga olinadi. Aktyor har bir sakkizoyoqni yutishdan oldin Xudodan chin dildan kechirim so‘raydi.

Bemaza: Leonardo Di Kaprio — “Omon qolgan” (2015)

Aktyor “Oskar” olib kelgan filmda rol o‘ynaganida obraziga to‘liq tushish uchun vegetarian bo‘lishiga qaramay, xom bizon jigarini iste’mol qiladi.  Dastlab yulduzga “qizil jelatin” beriladi. “U menga haqiqiy emasdek tuyuldi. Men haqiqiy narsani sinab ko‘rmoqchi bo‘ldim, lekin u mutlaqo jirkanch edi”, deydi Leonardo.

Bemaza: Mia Ferrou - “Rozmarinning chaqalog‘i” (1968)

Leo roli uchun xom jigar iste’mol qilgan birinchi aktyor emas. Roman Polanskining klassik filmida Mia Ferrou ham xom jigar yeydi, garchi o‘sha paytda u vegetarian bo‘lgan bo‘lsa ham. Keyin jigar bizonniki emas, balki tovuqniki bo‘lgan.

Mazali: Dante Basko va boshqa yo‘qolgan bolalar — “Kapitan Huk” (1991)

Stiven Spilbergning Netlandiyadagi ziyofati ikki marta to‘liq suratga olingan — uni tayyorlash uchun jami 50 ming dollar sarflangan. Barcha taomlar haqiqiy va nihoyatda mazali edi.

Rufio rolini ijro etgan Dante Basko taomlarning ko‘pi sahna uchun maxsus yaratilganini aytadi: “Hozir supermarketga borib, kerak bo‘lgan hamma narsani sotib olish mumkin. 90-yillarda buning iloji yo‘q edi. Shuning uchun ham mazkur sahna uchun taomlar alohida e’tibor bilan pishirilgan”.

Bemaza: zombi rolini o‘ynagan aktyorlar — “Tirik murdalar tuni” (1968)

Jorj A. Romeroning dahshatli klassikasidagi bir epizodda yuk mashinasi portlagandan keyin zombilar bayram qiladi. Ushbu sahnada ishtirok etgan aktyorlar uchun go‘shtni qayta ishlash zavodining egasi bo‘lgan homiylaridan biri tomonidan taqdim etilgan qo‘zichoq ichaklaridan “taom” qilishadi.

Go‘sht shokolad siropi bilan to‘ldirilgan va “zombi”larga taklif qilingan. Rejissyor va prodyuserlar massovka yetarli bo‘lmagani uchun professional aktyorlardan tashqari, ular ijodiy jamoa a’zolarini, investorlarni, do‘stlarni va hatto tasodifiy o‘tkinchilarni ham suratga olishadi.

Mazali: to‘y ziyofatida ishtirok etgan aktyorlar — “O‘ta badavlat osiyoliklar” (2018)

“O‘ta badavlat osiyoliklar” filmida boy odamlar qanday ovqatlanishi tasvirlangan ko‘plab epizodlar mavjud. Ammo kartinadagi hamma taomlar haqiqiy emas edi, chunki bu juda ko‘p vaqt va juda ko‘p pul talab qilardi. Masalan, to‘y ziyofati sahnasi uchun 300 kishiga taom tayyorlanadi.

Epizodda rol o‘ynagan aktyorlar faqat ba’zi qimmatbaho taomlar sun’iy ekanidan afsuslanishadi — ikra qora rangga bo‘yalgan xantal urug‘idan iborat bo‘lib, dengiz mahsulotlari xamirdan tayyorlangan.