Ba’zida oxirgi epizod tushunarsiz chiqsa, ba’zan esa butun mavsum finali muvaffaqiyatsizlikka uchraydi.
“Doktor Haus”
- AQSH, 2004-2012-yillar.
- Drama.
- Davomiyligi: 8 fasl.
- Oxirgi seriyaning IMDb reytingi: 9,3.
Sakkiz mavsum davomida tomoshabinlar haddan tashqari murakkab, ammo daho doktor Hausning ishlari va hayotini kuzatib bordi. Oxirgi mavsumga kelib, uning yordamchilari deyarli butunlay yangilandi, bu esa syujet sifatiga sezilarli darajada ta’sir ko‘rsatdi. Ammo finalga qiziqish kuchli edi, chunki u “Hamma o‘ladi” deb nomlangandi.
Haus o‘zining so‘nggi ishini hal qilib, o‘zi bilan bahslashadi va so‘nggi daqiqalarda, go‘yoki halok bo‘ladi. Ammo uning dafn marosimida Uilson do‘sti o‘limini soxtalashtirganini bilib qoladi. Yakunda ikkovlon motosiklda uzoqqa jo‘nab ketishadi.
Bunday yakunni yomon deb bo‘lmasa ham, mualliflarning hammaga ma’qul kelishga urinayotganini aniq sezish mumkin. Hausning keyingi taqdiri qanday bo‘lishi esa tushunarsiz.
“Klinika”
- AQSH, 2001-2010-yillar.
- Komediya, drama.
- Davomiyligi: 9 fasl.
- Oxirgi seriyaning IMDb reytingi: 6,1.
“Klinika” seriali mukammal yakunlangan: Jey Di ishini tugatadi, o‘g‘li bilan yaqinroq munosabat o‘rnatishga va Elliot bilan aloqalarini o‘zgartirishga qaror qiladi. U do‘stlari va hamkasblari bilan ta’sirchan xayrlashadi. Ammo bu... sakkizinchi mavsumning yakuni edi.
Aslida “Klinika” seriali aynan shu tarzda tugashi kerak edi. Biroq ABC telekanali serialni davom ettirishga majbur qiladi, shuning uchun yangi qahramonlar kiritilib, eski personajlar ikkinchi darajali qilib qo‘yiladi. Yangi obrazlar tomoshabinlarga yoqmagan, shuningdek, ikkinchi yakun qiziq bo‘lmagan.
“Onangizni qanday uchratganman”
- 2005-2014-yillar.
- Komediya, melodrama.
- Davomiyligi: 9 fasl.
- Oxirgi seriyaning IMDb reytingi: 5,5.
Bu serialning hikoyasi qisman “Klinika” serialidagi holatni eslatadi. Mualliflar sakkizinchi mavsumda, Tedd haqiqatan ham kelajakdagi farzandlarining onasi bilan uchrashgan paytda, serialni yakunlashlari kerak edi. Chunki aslida hikoya uning emas, balki bosh qahramonning do‘stlari bilan bo‘lgan munosabatlari haqida edi.
Ammo reytinglar rekord darajaga yetgani sababli serial davom ettirildi. Asosan, to‘qqizinchi mavsum Robinning Barni bilan to‘yiga tayyorgarlik haqida hikoya qiladi. So‘nggi qismlar esa do‘stlarning keyingi hayotlarini tezkorlik bilan yoritib beradi.
“Yevani o‘ldirish”
- AQSH, Buyuk Britaniya, 2018-2022-yillar.
- Drama, triller.
- Davomiyligi: 4 fasl.
- Oxirgi seriyaning IMDb reytingi: 3,4.
Bu serial Sandra O va Jodi Komerni yulduzga aylantirgan. Birinchi mavsumda ssenarist sifatida ishlagan Fibi Uoller-Brij josuslik trillerini komediya va drama bilan aralashtirgan ushbu serial afsonaga aylangan.
To‘rt mavsum davomida MI5 agenti Yeva va sotsiopat qotil Villanel o‘rtasidagi munosabatlar murakkablashib boradi: ular bir-birlariga dushman bo‘lib qolganmi yoki bir-birlariga mutlaqo bog‘lanib qolishganmi — buni tushunish qiyin. Bu ularni o‘zgartirib yuboradi: birinchisi dadillashadi, ikkinchisi esa odamlar bilan muloqot qilishni deyarli o‘rganadi. Ammo bu hikoyani qanday yakunlash mumkin edi?
Afsuski, mualliflar eng oddiy yo‘lni tanlaydi. Finalda Villanel nafaqat halok bo‘ladi, balki u Yevani himoya qilish uchun o‘z tanasi bilan to‘sadi. Bundan oddiyroq, klishega to‘la va zerikarli yakunni tasavvur qilish qiyin.
“Kartadan yasalgan uy”
- AQSH, 2004-2012-yillar.
- Drama.
- Davomiyligi: 8 fasl.
- Oxirgi seriyaning IMDb reytingi: 2,6.
“Taxtlar o‘yini”
- AQSH, Buyuk Britaniya, 2011-2019 yy.
- Fantastika, drama, sarguzasht.
- Davomiyligi: 8 fasl.
- Oxirgi seriyaning IMDb reytingi: 4,0.
Aslida “Taxtlar o‘yini” mualliflarining muammolari ancha oldin Jorj Martinning kitoblari tugagach boshlangan edi. O‘sha paytda mavjud ma’lumotlar asosida yangi syujet yaratish oson emasligi ma’lum bo‘ldi. Ammo bir muddat voqealar avvalgi izidan davom etdi va hammaga yoqdi.
Ammo oxiriga kelib hammasini izohlash kerak bo‘ldi. Sakkiz mavsum davomida hamma qo‘rqqan muz askarlarni birgina pichoq zarbi bilan mag‘lub etishdi. Ko‘plab qahramonlar o‘zini o‘ldirishga olib keladigan harakatlar qildi, meyster Kvibern esa oddiygina yiqilib halok bo‘ldi. Azor Ahay haqidagi afsona izohlanmasdan qoldi. Misollarni yana davom ettirish mumkin, qisqasi, serialni shoshilinchda yakunlashadi: yomonlar halok bo‘ladi, yaxshilar omon qoladi, Bran esa podshoh bo‘ladi.
“Dekster”
- 2006-2013-yillar.
- Drama, triller.
- Davomiyligi: 8 fasl.
- Oxirgi seriyaning IMDb reytingi: 4,8.
Ehtimol, “Dekster”ning yakuni ushbu ro‘yxatdagi boshqa misollar bilan solishtirganda unchalik yomon emasdir. Lekin u birinchi o‘rinni egallaydi: serial finalni ikki marta buzib qo‘ydi.
Birinchi marta bu serialning sakkizinchi mavsumida sodir bo‘ldi, o‘shanda mualliflar barcha syujet chiziqlarini shoshilinchda tugatishga qaror qilishdi. Debra hech qanday tushuntirishsiz vafot etdi, shaharda to‘satdan dovul yuz berdi, natijada qahramon yashirindi. Ijodkorlar hatto Deksterni o‘ldirishga jur’at etishmadi, bu esa eng mantiqiy yechim bo‘lardi: u yaxshi bo‘lishni xohladi, lekin ko‘p odamlarning o‘limiga sabab bo‘ldi. Serial oxirida shunchaki ixtiyoriy surgunga ketgani ko‘rsatildi. Sotsiopat uchun bu unchalik qattiq jazo emasdek ko‘rinadi.
Ammo bu ham yetarli emasdi. 2021-yilda serial “Yangi qon” nomli qo‘shimcha mavsum bilan qaytdi, unda Dekster o‘g‘li bilan uchrashadi va ular birgalikda ishlarini davom ettirishadi. Syujet yomon emasdi, ammo finalda yana hammasini bir seriyada o‘zgartirishga qaror qilishadi. Qahramon kutilmaganda mantiqsiz xatolar qiladi, qotillik sodir etadi va o‘g‘li tomonidan otib o‘ldiriladi. Natijada esa 2013-yilgi 4,8 reytingli yakun yoniga 2021-yilgi 4,7 reytingli yakun qo‘shildi.
Izoh (0)