Gollivud yulduzi bo‘lishning o‘ziga yarasha qiyinchiliklari ko‘p, masalan, mashhur insonlar hayotidagi barcha tafsilotlarni doim ham yashira olmaydi. Ammo gap farzand haqida ketganda, ba’zi ota-onalar merosxo‘rlarining shaxsiy daxlsizligini bor kuchi bilan himoya qiladi va ularni matbuot va muxlislar e’tiboridan uzoqroq bo‘lishini ta’minlaydi.
Elayja Vud
“Uzuklar hukmdori” filmi yulduzining farzandlari borligidan ko‘pchilik muxlislari bexabar bo‘lsa kerak, chunki aktyor shaxsiy hayoti haqida deyarli hech qanday ma’lumot bilan bo‘lishmaydi. Faqat 2023-yilda The Wall Street Journal’ga bergan intervyusida u ikkinchi farzandi borligini aytib o‘tgan.
“Oilamizda 3 yoshli o‘g‘limiz va 14 oylik qizimiz bor. Qizim bizni erta tongdan uyg‘otadi”, deydi Elayja. U ayoli Mette-Mari Kongsved bilan uzoq yillardan beri birga yashab kelmoqda.
Skarlett Yoxansson
Marvel olami yulduzi shaxsiy hayoti haqidagi tafsilotlarni doim sir saqlab kelgan. Uning ikkinchi turmush o‘rtog‘i Romen Doriakdan Rouz ismli 10 yashar qizi bor (birinchi turmushi — Rayan Reynoldsdan aktrisaning farzandlari yo‘q). 2022-yilda Skarlett va uning uchinchi eri, Saturday Night Live ssenaristi va aktyor Kolin Jostdan ikkinchi farzandi tug‘ildi, unga Kosmo ismi qo‘yildi.
Yoxansson Vanity Fair nashriga bergan intervyusida “Homiladorlik davrida men jamoatchilik e’tiboriga tushishni va tanamdagi o‘zgarishlar haqida ijobiy yoki salbiy fikrlar yozishlarini istamadim”, — deydi Yoxansson.
Aleksandr Skarsgard
“Haqiqiy qon” yulduzi bir necha yillardan beri shved aktrisasi Tuva Novotni bilan birga yashaydi, lekin o‘zining shaxsiy hayoti haqida hech qanday tafsilotlarni oshkor qilmaydi.
2022-yilda er-xotin Nyu Yorkda yangi tug‘ilgan chaqaloq bilan ko‘rinish berdi. Oradan besh oy o‘tgach, “Merosxo‘rlar” filmi to‘rtinchi mavsumi premyerasida Aleksandr ota bo‘lganini tasdiqladi va o‘zining maxfiylik qadriyatlariga amal qilgan holda chaqaloq qachon tug‘ilganini va uning ismi nima ekanligini aytmadi.
Natali Dormer
“Taxtlar o‘yini” yulduzi o‘zi va uning turmush o‘rtog‘i, aktyor Devid Ouks pandemiya davrida farzand ko‘rishga qaror qilganini aytgan edi. Natali hazilomuz tarzda: “Odamlar bu davrda yana nimalar bilan mashg‘ul bo‘lishi mumkin?” degan edi.
Dormerning aytishicha, karantin tufayli u homiladorligi va farzandli bo‘lganini uzoq vaqt sir saqlashga muvaffaq bo‘lgan.
Emmi Rossam
Emmi Rossam va uning turmush o‘rtog‘i — moda rejissyori, ssenariynavis va prodyuser Sem Esmeyl ham oilasiga yangi mehmon kelishi haqida hech kimga ma’lumot bermagan.
Er-xotinning birinchi farzandi 2021-yilda tug‘ilgani Emmining ijtimoiy tarmoqlardagi posti tufayli ma’lum bo‘lgan.
Maykl Sera
Kanadalik aktyor va musiqachi Maykl Sera ham OAVga shaxsiy hayoti haqida hech qanday ma’lumot bermasligi bilan ajralib turadi. Uning do‘sti Emi Shumer “Hayot va Bet” serialining premyerasi doirasida Entertainment Tonight nashriga bergan intervyusida aktyor ota bo‘lganini tasodifan aytib yuborgan.
Shumer 2 yoshli o‘g‘li haqida gapirib, Mayklning ham farzandi borligini ma’lum qilgan. Sera mazkur yangilikni tasdiqlagan, ammo hech qanday tafsilotlar bilan bo‘lishmagan.
Izoh (0)