Бугунги сериаллар тўпламининг барчаси тарихий жанрда бўлиб, ёрқин воқеаларга бой ушбу лойиҳалар Туркия ўтмишини ўрганишга ёрдам беради.
“Эртуғрул” (2014-2019)
“Эртуғрул” — продюсер Меҳмет Боздағ томонидан яратилган тарихий саргузашт телесериал. Ундаги воқеалар мусулмон ўғуз турклари тарихига асосланган бўлиб, XIII асрга тегишли давр ҳақида ҳикоя қилинади. Воқеалар марказида Усмонлилар империясининг асосчиси Усмон I нинг отаси Эртуғрул Бей ҳаёти туради. Тарихий сериални суратга олиш ишлари Туркиянинг Аланя, Бейкоз ва Невшеҳир шаҳарларида олиб борилган. Сериал 2014 йил 10 декабрда Туркиянинг TRT 1 телеканалида намойиш этилган.
“Ҳукмдор Усмон” (2019-ҳозирга қадар)
“Ҳукмдор Усмон” тарихий жанговар турк сериали ҳам Меҳмет Боздағ томонидан суратга олинган бўлиб, “Эртуғрул” нинг давомий қисми ҳисобланади. Сериал сюжети Эртуғрулнинг ўғли Усмон Ғозийнинг мустақиллик учун Салжуқийлар салтанатига қарши қандай курашгани ҳақида ҳикоя қилади. Империя яратиш учун Усмон ички душманларни мағлуб этиши, сўнгра кучли Мўғул ва Византия империялари билан тўқнашувга киришиши керак бўлади.
“Алп Арслон: Буюк салжуқий” (2021)
Режиссёр Седат Инжи ва продюсер Эмре Конук томонидан суратга олинган мазкур тарихий сериал Алп Арслоннинг Салжуқийлар империясининг султони сифатида ҳукмронлик қилган даврда содир бўлган сиёсий воқеалар ва урушлар ҳақида ҳикоя қилади. Сериалда бош ролни кўпчиликка “Ижарага олинган севги” мелодрамаси билан танилган Бариш Ардуч ижро этган.
“Қалбим султони” (2018)
2018 йилда суратга олинган тарихий мелодрама жанридаги кўп қисмли бадиий фильм Россия ва Туркия кинематографлари ҳамкорлигида суратга олинган. Унда Россия империяси амалдорининг қизи Анна элчихонада ўқитувчи бўлиб ишлайди. Султон Маҳмуд халқ орасига кетаётиб, унга дуч келади ва қизнинг ақл-заковати ва билимига қойил қолади. У Аннани саройга ўз фарзандларига ўқитувчи бўлиб ишлашга таклиф қилади. Вақт ўтиб улар бир-бирига кўнгил қўяди.
“Афсона” (2021-2022)
“Афсона” сериали XIII асрда турклар исломни қабул қилган даврдаги Ўрта Осиёда бўлган воқеаларга асосланган. Оққиз Ўрта Осиёнинг тоғли ҳудудларида яшайди. У отасини ўлдирган Алпағу Хоннинг айби билан эрта етим қолади. Шу сабабли қиз ўзини боқиш, ҳимоя қилишни ўрганиш учун эрта улғайишга мажбур бўлади ва Оққиз душманларига қарши туришга қодир ёш жангчи айланади. У болалигида хондан ўч олишга ўзига ваъда беради ва унинг бойлигини ўғирлаб, камбағалларга тарқатади. Аммо қизнинг ҳаёти энг ашаддий душманининг ўғли билан учрашганда тубдан ўзгариб кетади.
Изоҳ (1)
Afsona seryali qachon chiqadi