AQSHning saylangan prezidenti Donald Tramp jamoasi Eronni jilovlash bo‘yicha siyosiy reja taklif qildi. Isroil harbiy-havo kuchlari tomonidan Eron yadro obyektlariga zarba berish ham ko‘rib chiqilmoqda. Bu haqda manbalarga tayanib, The Wall Street Journal xabar berdi.
AQSH ushbu reja amalga oshishi uchun Eron yadro obyektlarini ishdan chiqara oladigan “zamonaviy qurollar"ni Isroilga yetkazib berishi kerak. Trampning jamoasi Eronning yadroviy qurol yaratishi ehtimoliga munosabat bildirishning ikki variantini ko‘rib chiqmoqda.
Birinchisi, Yaqin Sharqqa “ko‘proq” Amerika qo‘shinlari va texnikasini yuborish, zarba berish uchun Isroilga qurol sotish va Eronga qarshi sanksiya rejimini kuchaytirish orqali harbiy bosimni o‘z ichiga oladi. Ikkinchi variant sanksiyalarni kuchaytirish bilan birga “harbiy kuch tahdidi”dan iborat.
Tramp Isroil bosh vaziri Binyamin Netanyaxu bilan telefon suhbatida Eronning yadro sohasidagi yutuqlaridan tashvishda ekanini bildirgan, deyiladi xabarda.
Shu bilan birga, siyosatchi “yangi urushni, ayniqsa AQSH armiyasi unga jalb etilgan holatdan qochish”ni istaydi.
Eron bilan to‘qnashuv ehtimoli
Hozir Eronda bir necha kun ichida to‘rtta yadroviy bomba yaratish uchun yetarli darajada boyitilgan uran mavjud. Tramp 12-dekabr kuni Eronning “bir necha hafta ichida bomba yaratish” imkoniyatlari harbiy to‘qnashuvga olib kelishini inkor etmadi. Hozirda Isroil Eron hududidagi yadroviy obyektlarga ehtimoliy zarba berishga tayyorlanmoqda. Netanyaxu Eron aholisiga murojaat qilib, Isroil “o‘zi bilan chinakam tinchlik istovchi barcha davlatlar bilan tinchlik o‘rnatishni xohlayotganini” aytdi.
Izoh (0)