АҚШнинг сайланган президенти Дональд Трамп жамоаси Эронни жиловлаш бўйича сиёсий режа таклиф қилди. Исроил ҳарбий-ҳаво кучлари томонидан Эрон ядро объектларига зарба бериш ҳам кўриб чиқилмоқда. Бу ҳақда манбаларга таяниб, The Wall Street Journal хабар берди.
АҚШ ушбу режа амалга ошиши учун Эрон ядро объектларини ишдан чиқара оладиган “замонавий қуроллар"ни Исроилга етказиб бериши керак. Трампнинг жамоаси Эроннинг ядровий қурол яратиши эҳтимолига муносабат билдиришнинг икки вариантини кўриб чиқмоқда.
Биринчиси, Яқин Шарққа “кўпроқ” Америка қўшинлари ва техникасини юбориш, зарба бериш учун Исроилга қурол сотиш ва Эронга қарши санкция режимини кучайтириш орқали ҳарбий босимни ўз ичига олади. Иккинчи вариант санкцияларни кучайтириш билан бирга “ҳарбий куч таҳдиди”дан иборат.
Трамп Исроил бош вазири Биньямин Нетаньяху билан телефон суҳбатида Эроннинг ядро соҳасидаги ютуқларидан ташвишда эканини билдирган, дейилади хабарда.
Шу билан бирга, сиёсатчи “янги урушни, айниқса АҚШ армияси унга жалб этилган ҳолатдан қочиш”ни истайди.
Эрон билан тўқнашув эҳтимоли
Ҳозир Эронда бир неча кун ичида тўртта ядровий бомба яратиш учун етарли даражада бойитилган уран мавжуд. Трамп 12 декабрь куни Эроннинг “бир неча ҳафта ичида бомба яратиш” имкониятлари ҳарбий тўқнашувга олиб келишини инкор этмади. Ҳозирда Исроил Эрон ҳудудидаги ядровий объектларга эҳтимолий зарба беришга тайёрланмоқда. Нетаньяху Эрон аҳолисига мурожаат қилиб, Исроил “ўзи билан чинакам тинчлик истовчи барча давлатлар билан тинчлик ўрнатишни хоҳлаётганини” айтди.
Изоҳ (0)