AQSHning saylangan prezidenti Donald Tramp New York Post gazetasiga bergan intervyusida Ukraina yetakchisi Vladimir Zelenskiy o‘t ochishni to‘xtatishni hamda sulh tuzishni xohlashini aytdi.
“Zelenskiy sulh tuzmoqchi. U o‘t ochishni to‘xtatishni istaydi. Biz tafsilotlarni muhokama qilmadik. U vaqt keldi deb o‘ylayapti”, dedi Tramp Zelenskiy bilan Parijda uchrashganida.
Avvalroq Tramp Zelenskiy va Ukraina “kelishuvga erishmoqchi” ekanini aytib, zudlik bilan o‘t ochishni to‘xtatish va muzokaralar o‘tkazishga chaqirgan edi.
Rossiya prezidenti matbuot kotibi Dmitriy Peskov Moskva Tramp bayonotini ko‘rib chiqqanini ma’lum qilgan. U Putin tinchlik muzokaralarini o‘tkazish shartlarini aytganini, biroq Ukraina hamon muloqotdan bosh tortayotganini ta’kidlagan.
Peskovning so‘zlariga ko‘ra, Zelenskiyga muzokaralarni taqiqlash haqidagi farmonni bekor qilish va “yuzaga kelgan voqelikni hisobga olgan holda Istanbul kelishuvlari asosida” muloqotni qayta boshlash bo‘yicha ko‘rsatma berish kifoya qiladi.
WSJ nashri avvalroq Ukraina prezidenti ofisi rahbari Andrey Yermak Tramp jamoasi vakillari — milliy xavfsizlik bo‘yicha maslahatchi lavozimiga nomzod Mayk Vals hamda Rossiya va Ukraina bo‘yicha maxsus elchi lavozimiga da’vogar Keyt Kellog bilan uchrashgani haqida xabar bergan edi. Nashr ma’lumotlariga ko‘ra, munozaralarga saylangan vitse-prezident J.D.Vens ham qo‘shilgan. Bundan oldin nashr Yermak Floridada Tramp boshqaruvida Oq uy apparatini boshqarishi kerak bo‘lgan Syuzi Uayls bilan uchrashganini qayd etgan edi.
Izoh (0)