AQSHning saylangan prezidenti Donald Trampning kuyovi Jared Kushner yangi ma’muriyatning Yaqin Sharqdagi harakatlarida muhim rol o‘ynaydi. Bu haqda CNN manbalarga tayanib xabar berdi.
Unga ko‘ra, Kushnerning hukumatda rasmiy lavozimni egallashi dargumon, ammo Trampning mintaqadagi siyosatida “asosiy figura” bo‘lishi aytilmoqda. Manbalarga ko‘ra, Kushner Yaqin Sharqning ko‘plab yetakchilari bilan yaxshi aloqaga ega.
Yaqin Sharqdagi aloqalar
Avvalroq Financial Times Trampning kuyovi respublikachilarning yangi ma’muriyati davrida Oq uyga qaytmasligi haqida xabar bergan edi.
Nashrning ta’kidlashicha, Kushner Trampning avvalgi muddatida katta maslahatchisi bo‘lgan. Isroil va bir qancha arab davlatlari, jumladan BAA, Bahrayn, Sudan va Marokash o‘rtasida diplomatik munosabatlar o‘rnatgan kelishuvlar bo‘yicha muzokaralarda muhim rol o‘ynagan.
Kushner hukumatga qaytishdan manfaatdor emasligini bir necha bor aytgan, biroq Trampning g‘alabasi va Yaqin Sharqdagi hozirgi inqiroz uning fikrini o‘zgartirishiga sabab bo‘lishi mumkin.
Trampning yangi administratsiyasi
Tramp o‘z administratsiyasini shakllantirishni hozirdan boshlamoqda. Ma’lumotlarga ko‘ra, u yangi jamoasida ashaddiy isroilparastlar bo‘lishini xohlayapti.
Jumladan, u Mudofaa vaziri lavozimiga amerikalik teleboshlovchi, Afg‘oniston va Iroqdagi urushlar faxriysi, Falastin davlatchiligiga qarshi fikrlari bilan tanilgan Pit Hegsetni taklif qildi.
Shuningdek, milliarderlar Ilon Mask va Vivek Ramasvami Donald Tramp davrida hukumat samaradorligiga erishish bo‘yicha yangi departamentga rahbarlik qilishi xabar berildi.
“Birgalikda bu ikki ajoyib amerikalik mening ma’muriyatim uchun davlat byurokratiyasini demontaj qilish, ortiqcha qoidalarni, keraksiz xarajatlarni kamaytirish va federal agentliklarni qayta tashkil etish yo‘lini ochib beradi”, degan Tramp.
Izoh (0)