Falastinning HAMAS harakati delegatsiyasi G‘azo sektorida o‘t ochishni to‘xtatish bo‘yicha muzokaralar olib borish uchun Qohiraga boradi. Bu haqda The Times of Israel nashri xabar berdi.
AQSH respublikachi senatori Lindsi Grem o‘tgan hafta Isroilga tashrif buyurib, rasmiylar, jumladan, Bosh vazir Binyamin Netanyaxu bilan uchrashdi. Muzokaralar chog‘ida u AQSHning saylangan yetakchisi Donald Tramp yanvar oyida inauguratsiyasidan oldin G‘azo sektorida o‘t ochishni to‘xtatish bo‘yicha kelishuvga ko‘maklashishni xohlayotganini aytdi.
“Trampning bu bayonoti 30-noyabr shanba kuni HAMAS delegatsiyasining o‘t ochishni to‘xtatish bo‘yicha muzokaralar o‘tkazish uchun Qohiraga kelishidan oldin yangradi”, deyiladi maqolada.
Isroil va Livanning “Hizbulloh” harakati 27-noyabrdan kuchga kirgan o‘t ochishni to‘xtatish bo‘yicha kelishuvga erishdi. Mazkur kelishuvda vositachilik qilgan AQSH prezidenti Jo Baydenning aytishicha, kelishuv “harbiy harakatlarni doimiy to‘xtatish” va tinch aholining Livan-Isroil chegarasidagi jabrlangan hududlarga qaytishi uchun sharoit yaratishni o‘z ichiga oladi.
Avvalroq Qatar HAMAS va Isroil o‘rtasida tinchlikka erishishdagi vositachilik sa’y-harakatlarini tiklashi xabar berilgandi.
“Hukumatim nomidan shuni taʼkidlaymanki, biz har ikki tomonning tinchlikka erishish istagini ko‘rganimizdan so‘ng, Qatar bu mojaroni tinchlik bilan hal qilish yo‘lidagi barcha saʼy-harakatlarni to‘liq yangilashini ko‘rasiz”, dedi Qatar TIV rasmiy vakili Majid bin Muhammad al Ansoriy Rimda bo‘lib o‘tgan O‘rta Yer dengizi konferensiyasida.
Qatar TIV vakilining qayd etishicha, Qatar har ikkala tomonning tayyorligini ko‘rsa, darhol muzokaralar stoliga qaytishga tayyor.
Izoh (0)