Afg‘oniston konchilik va neft vazirligi matbuot kotibi Esmatulla Burhon TAPI (Turkmaniston, Afg‘oniston, Pokiston, India (Hindiston) gaz quvuri qurilish ishlari to‘rt oy ichida qayta boshlanishini ma’lum qildi, deya xabar bermoqda TOLOnews nashri.
“Qurilishning kechikishi sababi gaz quvuri yotqiziladigan yerni sotib olish bilan bog‘liq. Ayni damda qurilishni boshlash uchun zarur bo‘lgan hududning o‘n besh foizga yaqinini xarid qilish qoldi” — degan Esmatulla Burhon. “Tolibon” rasmiysi bu vazifa yaqin kelajakda hal bo‘lishini ham aytib o‘tgan.
Joriy yilning yanvar oyida “Tolibon” (Afg‘onistonning amaldagi hukumati) vakillari Ashxobodga tashrif buyurib, TAPI qurilishi mart oyida qayta tiklanishi rejalashtirilayotganini ma’lum qilgan edi. Biroq bu va’da amalga oshmadi. Avvalroq loyihaning boshqa ishtirokchilari gaz quvurining xavfsizligi haqida bir necha bor xavotir bildirgandi. Bunga javoban 2022-yil fevral oyida “Tolibon” TAPI himoyasini ta’minlash rejasini taqdim etdi.
Mart oyida loyihaning koordinatori bo‘lgan Osiyo taraqqiyot banki (OTB) “Tolibon hukumati BMT va dunyoning yirik iqtisodlari tomonidan tan olinmaguncha” loyihadagi ishtirokini to‘xtatgan edi. “Tolibon” esa, o‘z navbatida, qurilish OTBsiz davom etishini ma’lum qildi.
Aprel oyida Hindiston prezidenti Turkmanistonga tashrifi chog‘ida yana TAPI xavfsizligi masalasini ko‘tardi. Turkmaniston tomoni Hindistonning gaz quvuri xavfsizligini ta’minlash bo‘yicha takliflarini “biznes yuritish tamoyillarini” integratsiyalashtirgan holda o‘rganishga va’da berdi.
Izoh (0)