Afg‘onistondagi “Tolibon” hukumatining Ichki ishlar vazirligi vakillari va TAPI Pipeline (Turkmaniston—Afg‘oniston—Pokiston—Hindiston tabiiy gaz quvuri) kompaniyasi bosh ijrochi direktori Muhammetmurat Amanov o‘rtasida 25-avgust kuni onlayn muzokaralar bo‘lib o‘tdi. Bu haqda Bakhtar nashri xabar bermoqda.
Amanov quvur xavfsizligini ta’minlash masalalari bilan qiziqqan. Uchrashuvning boshqa tafsilotlari keltirilmagan.
20-avgust kuni TOLO news telekanali Afg‘oniston hukumatida TAPI bo‘yicha amaliy ishlarni boshlash uchun qo‘mita tuzilgani haqida xabar bergandi. Yangi tuzilmani bosh vazirning birinchi o‘rinbosari mulla Abdul G‘ani Baradar boshqargan.
Afg‘oniston Tashqi ishlar vazirligi ma’lumotlariga ko‘ra, Afg‘oniston delegatsiyasi gaz narxi va gaz quvuri loyihasini amalga oshirish masalalarini muhokama qilish uchun tez orada Turkmanistonga tashrif buyuradi.
“Biz Turkmanistonga tashrif buyurib, gaz narxlari, Hirotdagi loyihalarni amalga oshirish (ushbu viloyat orqali gaz quvuri yotqiziladi – “Daryo” izohi), shuningdek, sanoat parklari masalalarini muhokama qilish niyatidamiz”, — degan Afg‘oniston TIV matbuot kotibi Shafay A’zam.
Eslatib o‘tamiz, “Tolibon” hukumati TAPI xavfsizlik rejasini Turkmaniston tomoniga 2022-yilning fevral oyida taqdim etgandi. Gaz quvurlarini himoya qilish rejasining tafsilotlari oshkor etilmagan.
Izoh (0)