Kolumbiya politsiyasi 61 mamlakatdagi hamkasblari bilan birgalikda narkotik moddalar savdosiga qarshi “Orion” deb nomlangan keng ko‘lamli operatsiya o‘tkazdi.
Olti hafta ichida rekord darajadagi 225 tonna kokain musodara qilindi. Taqqoslash uchun, 2022-yilda Kolumbiyada 671 tonna giyohvand moddalar musodara qilingan.
Hammasi bo'lib 1,4 ming tonna giyohvandlik vositalari, jumladan, 1 ming tonnaga yaqin marixuana musodara qilindi. Ularning umumiy qiymati 8,5 milliard dollarga baholanmoqda. Operatsiya natijasida 400 dan ortiq odam hibsga olingan.
Bundan tashqari, politsiya oltita kemani ham qo'lga oldi. Bu kemalar Avstraliyaga giyohvand moddalarni tashish uchun ishlatilgani aytilmoqda.
“Avstraliyada kokainning yuqori bahosi (1 kg uchun 240 ming dollar – AQShnikidan 3-6 baravar qimmat) bu bozorni giyohvand moddalar savdosi bilan shug‘ullanuvchilar uchun juda jozibador qiladi”, deyiladi The Guardian nashridagi maqolada.
25-noyabr kuni Salvadorda 50 million dollarlik kokain ortilgan qayiq ushlangani xabar berilgandi.
Estero-de-Jaltepeke ko‘rfazidan 752 km janubi-g‘arbda uch kolumbiyalik 50 million dollarlik giyohvand moddalarni olib ketayotgan kema qo‘lga olingan.
Salvador prezidenti Nayib Bukele so‘nggi sakkiz oy ichida mamlakat huquq-tartibot idoralari xalqaro suvlarda 15 tonnadan ortiq kokainni musodara qilgani, ularning narxi taxminan 380 million dollarni tashkil etishini aytgan.
Izoh (0)