Ispaniya politsiyasi Marokashdan dengiz orqali narkotik moddalarni olib o‘tish uchun mo‘ljallangan uchta suvosti dronini qo‘lga oldi. Bu haqda The Local xabar berdi.
Ispaniya politsiyasi ma’lumotlariga ko‘ra, ushbu suvosti apparatlari 200 kilogrammgacha yukni ko‘tarishga qodir. Dronlar fransuz narkosavdogarlariga sotish uchun mo‘ljallangan, ular esa qurilmalardan kokain tashish uchun foydalanishni rejalashtirgan, deyiladi ma’lumotlarda. Qayd etilishicha, dronlardan biri to‘liq qurilgan, yana ikkitasi hali qurilayotgan bo‘lgan.
Politsiya Kadis, Malaga va Barselona shaharlarida giyohvand moddalar savdosi va jinoiy tashkilotga tegishli bo‘lgan sakkiz kishini hibsga oldi. Hibsga olish Fransiya politsiyasi bilan hamkorlikda 14 oy davom etgan tergov natijasi bo‘ldi.
Jinoiy guruh Italiya, Fransiya va Daniyadagi jinoiy mijozlarga ham logistika xizmatlarini taklif qilgan. Bundan tashqari, ulardan 14 kilogramm gashish, 8 kilogramm marixuana, 157 ming 300 yevrodan ortiq naqd pul va 6 dona yirik dron musodara qilindi.
Politsiya bayonotida aytilishicha, Ispaniya rasmiylari giyohvand moddalarni tashish uchun mo‘ljallangan suvosti dronlariga birinchi marta duch kelmoqda.
Izoh (0)