Birlashgan Millatlar Tashkiloti (BMT) xabar berishicha, COVID-19 tufayli joriy etilgan lokdaunlar muntazam ravishda kannabis iste’mol qilishning ortishiga olib kelgan, bu esa depressiya va o‘z joniga qasd qilish xavfini oshirgan. Bu haqda Reuters xabar berdi.
BMTning Giyohvand moddalar va jinoyatchilik bo‘yicha boshqarmasining Giyohvand moddalar bo‘yicha global hisobotida ta’kidlanishicha, kannabis uzoq vaqtdan beri dunyoda eng ko‘p qo‘llaniladigan narkotik bo‘lib kelgan va undan foydalanish ortib bormoqda.
2012-yilda Vashington va Koloradodan boshlab AQSHning turli shtatlari kannabisdan tibbiy bo‘lmagan maqsadlarda foydalanishni qonuniylashtirgan. Urugvay buni 2013-yilda, Kanada 2018-yilda qonuniylashtirgan. Boshqa davlatlar ham xuddi shunday qadamlar qo‘ygan, biroq hisobotda asosiy e’tibor shu uch davlatga qaratilgan.
“Kannabisning qonuniylashtirilishi giyohvand moddalarni kundalik iste’mol qilish haqidagi hisobotlarda o‘sish tendensiyasini tezlashtirgan ko‘rinadi. O‘smirlar orasida kannabisdan foydalanish ko‘rsatkichi deyarli o‘zgarmagan bo‘lsa-da, yoshlar orasida kuchli ta’sir qiluvchi mahsulotlardan foydalanish ko‘paygan”, — deyiladi tashkilot hisobotida.
Hisobotda aytilishicha, 2020-yilda taxminan 284 million kishi (dunyo aholisining 5,6 foizi) geroin, kokain, amfetamin yoki ekstazi kabi giyohvand moddalarni iste’mol qilgan. Ulardan 209 million kishi kannabis iste’mol qilgan.
“COVID-19 pandemiyasi davridagi lokdaunlar 2020-yilda kannabis iste’molining ko‘payishiga yordam berdi. Kannabis iste’moli bilan bog‘liq ruhiy kasalliklar va o‘z joniga qasd qilishlar ulushi oshdi”, — deyiladi hisobotda.
Unga ko‘ra, 2020-yilda kokain ishlab chiqarish rekord darajaga yetgan, shuningdek, 2021-yilgi ma’lumotlarga ko‘ra, giyohvand moddalarning ikkita asosiy bozori — Shimoliy Amerika va Yevropadan Afrika va Osiyoga kengaygan.
Opioidlar eng halokatli narkotik bo‘lib qolmoqda, fentanil esa AQSHda dozani meyoridan oshirish oqibatidagi o‘lim bo‘yicha yangi rekordga olib keldi: 2021-yilda taxminiy hisob-kitoblarga ko‘ra 107 622 kishi shu sabab bilan vafot etgan.
Izoh (0)