Salvador huquq-tartibot idoralari xodimlari respublika qirg‘oqlari yaqinida ikki tonna kokainni musodara qilishga muvaffaq bo‘ldi.
Bu haqda mamlakat prezidenti Nayib Bukele X ijtimoiy tarmog‘ida yozgan.
Unga ko‘ra, Estero-de-Jaltepeke ko‘rfazidan 752 km janubi-g‘arbda uch kolumbiyalik 50 million dollarlik giyohvand moddalarni olib ketayotgan kema qo‘lga olingan.
Bukelening ta’kidlashicha, so‘nggi sakkiz oy ichida Salvador huquq-tartibot idoralari xalqaro suvlarda 15 tonnadan ortiq kokainni musodara qilgan, ularning narxi taxminan 380 million dollarni tashkil qiladi.
Avvalroq Meksika Harbiy-dengiz kuchlari vazirligi Michoakan shtati qirg‘oqlari yaqinida departament tarixidagi eng yirik partiya bo‘lgan og‘irligi 8,3 tonnadan ortiq narkotik moddalarni musodara qilgani ma’lum etilgandi.
“Musodara qilish hajmi bo‘yicha rekord hisoblangan operatsiyada harbiy xizmatchilar taxminan 8361 kg narkotik moddani qo‘lga olishdi. Narkotik moddalarni olib ketayotgan 23 nafar shaxs hozirda qamoqda”, deyilgan bayonotda.
13-noyabr kuni Surxondaryoda Cobalt’da 50 kilodan ortiq narkotik modda olib ketayotgan shaxs qo‘lga tushgani xabar qilingan.
Izoh (0)