“Nadomat” loyihasining navbatdagi suhbatdoshi oliy ma’lumotli shifokor. U Rossiyaning nufuzli tibbiyot institutida tahsil olgan. Ammo giyohvandlik sabab yoshligi va sog‘lig‘ini behuda o‘tkazdi. 16 yil davom etgan qaramlik unga har taraflama zarar yetkazdi.
— Kollejda o‘qib yurgan kezlarim katta yigitlar sport binosining orqasiga yig‘ilib nimadir qilardi, bu menga qiziq tuyulardi. Pivo ichishadi deb o‘ylardim. Bir kun meni ham chaqirishdi — nasha chekishayotgan ekan. O‘shanda birinchi marta men ham chekib ko‘rdim. Boshim aylanib g‘alati hissiyot bo‘ldi, oldin bunaqasi bo‘lmagandi. Hayot ko‘zimga chiroyli ko‘rina boshladi, albatta, qiziqib ketdim. Yigitlar ko‘p yig‘ilardi, men haftada bir qo‘shilardim. Pul tashlab, o‘rtada sotib olardik, u vaqtlar uncha qimmat bo‘lmasdi. Giyohvand moddalarga qaramligim shundan boshlangan.
Keyinroq pivo va alkogol ham iste’mol qiladigan bo‘ldim. Bunday narsalarga doim pul topganman, chunki o‘zim ishlardim, topolmasam, ota-onamdan boshqa narsa uchun deb olardim. Uyimda doim bir bankada nasha bo‘lardi. Ishdan kelib hidlab, uxlab, universitetga tayyorlov kursiga ketardim. Shu vaqt davomida suzishga ham borardim. Olti yoshimdan suzishga qatnab, 18 ga kirganimda respublika chempioni bo‘lganman.
“Giyohvand moddalar hayotimga ta’sir qilmaydi, deb o‘ylardim. Rossiya institutiga stomatoligiya yo‘nalishiga o‘qishga kirib, ijara haqini to‘lash uchun kechqurun karaoke barda ishlardim va, tabiiyki, ko‘p ichardim. O‘sha vaqtlar 3-kursda o‘qirdim. Bir tanishim hidlaydigan moddasi borligini aytdi, kokain ekan. Hidladim, kuch berdi, ammo eyforiya emas. Keyin o‘zim ham tanish-bilishlardan so‘rab qidirib topdim. Statistikada kokaindan hech qanday o‘lim holati bo‘lmaganini bilardim, shuning uchun qo‘rqmasdim. Lekin boshqa moddalardan odamlar o‘zini, farzandini derazadan tashlab yuborganini bilaman”.
— Keyinchalik sintetik giyohvandlik moddasini hidlab ko‘rdim. Shu darajada eyforiya bo‘ldiki, tasvirlab berishning iloji yo‘q. Toshkentga qaytganimda akam uylandi, singlim turmushga chiqdi. Navbat menga yetganda yaxshiroq ishlash uchun karaoke bar ochdim. Bir kuni kuzatuv kamerasida bir mehmon hidlayotganini ko‘rib qoldim va yoniga borib militsiya chaqirishimni aytdim. U menga yaxshi gapirib “zahar”dan taklif qildi. Shu bilan qaytib o‘zimni to‘xtata olmadim. Tadbirkorligimdan keladigan foydani ishchilarning maoshini berish va qolgan hammasini faqat giyohvand moddalarga sarflardim.
— Iste’mol qilganimda umuman boshqacha hissiyot, lekin uyg‘onganda kuchli bosh og‘rig‘i, charchoq bo‘lardi. Bunday moddalar xotira susayishiga ham olib keladi.
— Narkotik hammaga har xil ta’sir qiladi. Mefedronning yomon tarafi — odam nima deyayotganini anglamaydi, diqqatini yo‘qotadi. Iste’mol qiladiganlarning ko‘pchiligi mashinada bo‘lsa, odam urib yuboryapti, o‘z joniga qasd qilyapti. Bizning odamlar bunday voqealarni eshitmaydi, ko‘rmaydi, ko‘rmaguncha ishonmaydi. Kim bo‘lishidan qayt’i nazar, giyohvandlikning oxiri yaxshilik bilan tugamaydi. Na ota-ona, na do‘st — hech kim ko‘zga ko‘rinmaydi, qadri qolmaydi. O‘ziga to‘q oilaning farzandiman, otam ko‘pchilik taniydigan stomatolog. Onam ham ilmli ayol. Oilamizda bunday ishlar bo‘lmagani uchun hech kim mendan shubhalanmagan.
— Bir tanishim sen shifokorsan-ku qilolasan, giyohvand moddani tomirimdan yuborib qo‘y, derdi. Rahmim kelgandanmi, bilmadim, yo‘q deyolmasdim. Lekin bunga men oxirgi yo‘l sifatida qarardim. Giyohvand moddalardan 3-4 baravar ko‘proq iste’mol qilib ham huzurlanmay qo‘ygandim. O‘shandagina tanishimning taklifi bilan o‘zim ham tomirdan ukol qildirishni boshladim va bundan ham qayta olmadim. Uylanaman deb mashinamni sotgan pulim uydagi seyfda turardi. Tomirdan yuborishga o‘rganib qolganimdan keyin o‘sha puldan ko‘proq olishni boshladim. Bir kuni otam qo‘ng‘iroq qilib 8 ming dollar yo‘qligini aytgan. Xayolimda nari borsa ming-ikki ming dollar olgandirman, deb o‘ylardim. Ikki oy ichida shuncha pulni sovurib yuborganman.
Ota-onalar buning alomatlarini bilib olsa bo‘ladi — bola tezda ozib ketadi, qorayib, jag‘ qismi qimirlaydigan bo‘lib qoladi. Internetdan qiziqib o‘qib qo‘ysa zarar qilmaydi. Hozir maktab bolalarida eng kuchli va xavflilari bor, ota-onalar ogoh bo‘lishsin. Men bu narsalarni “qo‘ldan” sotib olardim, yaqin 3-4 yil ichida hammasini Telegram’da sotadigan guruhlar paydo bo‘ldi.
— Hali uylanmaganman, 32 yoshdaman. Rossiyada bitta bolam bor, pul yuborib yordam qilib turaman, lekin Toshkentda uylanmadim. Giyohvandlik ortidan juda ko‘p kasalliklar kelib chiqadi. Meni Alloh asradi. Och qoringa suv ichishim kerak, bo‘lmasa oshqozonimdagi yaralar ochilib ketadi. Bu xotiramga ham ta’sir qildi. Hozirda davolanib, sog‘lig‘imga e’tibor beryapman. Suzish, sport bilan shug‘ullanaman, doimiy parhez qilaman.
Izoh (0)