AQSH prezidentining o‘g‘li, tadbirkor Xanter Bayden soliq to‘lashdan bo‘yin tovlaganlikda ayblanmoqda. Bu haqda Kaliforniyadagi Katta hakamlar hay’ati xulosasida aytiladi.
Prokurorlarning ta’kidlashicha, kichik Bayden 2016-yildan 2020-yilgacha kamida besh yil davomida 1,4 million dollar soliqni to‘lamagan, shuningdek, yolg‘on deklaratsiyalar taqdim etgan.
2016-yildan 2020-yil 15-oktyabrgacha sudlanuvchi bu pulni (soliq to‘lash uchun ishlatilishi mumkin bo‘lgan mablag‘) giyohvand moddalar, eskortlar va mashuqalari, hashamatli mehmonxonalar va ijara mulklari, ekzotik mashinalar, kiyim-kechak va boshqa shaxsiy buyumlarga, umuman olganda, soliqlardan tashqari hamma narsaga sarflagan, — deb ta’kidladi hakamlar hay’ati a’zolari.
Hammasi bo‘lib, ayblov xulosasi to‘qqizta bandni tashkil etdi.
CNN aniqlik kiritishicha, maxsus prokuror Devid Vays so‘nggi haftalarda Xanter Baydenga qarshi jinoiy ayblovlar bilan bog‘liq ko‘rsatma va dalillar to‘plagan. Avgust oyida u Bayden sudga tortilishi mumkinligini aytgandi.
Sentyabr oyida Amerika prezidentining o‘g‘liga qurol sotib olishda huquqbuzarlik aybi qo‘yilgandi. U 2018-yilda Colt Cobra 38 maxsus revolverini xarid qilish chog‘ida anketani to‘ldirayotib giyohvand moddalar iste’mol qilmasligi haqida yolg‘on ma’lumot bergan. O‘sha paytda u kokainga qaramlik bilan kurashayotgan edi.
Xanter Bayden giyohvand moddalarni iste’mol qilishi haqida The Wall Street Journal nashri 2014-yilda yozgandi. Prezidentning o‘g‘li unda kokain aniqlanganidan keyin harbiy-dengiz floti zaxirasidan chiqarilgan. U 2013-yil may oyidan beri harbiy-dengiz kuchlari zaxirasida.
Bundan tashqari, Bayden 2017 — 2018-yillarda topgan 1,5 million dollardan ortiq daromadidan budjetga 100 ming dollardan ortiq soliq to‘lashdan bo‘yin tovlaganlikda ayblanmoqda.
Xanter Bayden soliq to‘lashdan bo‘yin tovlaganlik va noqonuniy qurol saqlashda aybini tan olishga hamda giyohvandlikdan davolanishga tayyorligini bildirgandi, biroq sudya kelishuvni tasdiqlashdan bosh tortdi.
Izoh (0)