Rossiya federatsiyasining bir nechta yirik shaharlarida Qirg‘iziston Respublikasi Ichki ishlar vazirligining vakolatxonalari o‘z faoliyatini boshladi. Bu haqda Qirg‘iziston IIV matbuot xizmati xabar bermoqda.
Ta’kidlanishicha, vatandoshlarning huquq va manfaatlarini himoya qilish hamda noqonuniy xatti-harakatlarga yo‘l qo‘ymaslik masalalarida ko‘maklashish maqsadida Qirg‘iziston IIV vakolatxonalari Moskva, Sankt-Peterburg, Yekaterinburg va Novosibirskda o‘z faoliyatini boshlagan.
Ma’lum qilinishicha, Qirg‘iziston IIVning RFdagi vakolatxonasi va Rossiya IIV Xalqaro hamkorlik boshqarmasi rahbariyati o‘rtasidagi uchrashuvda idoralararo hamkorlik, jinoyatchilikka qarshi kurashish, narkotik jinoyatlarining oldini olish, fuqarolarni, ayniqsa, yoshlarni narkotik moddalarning noqonuniy aylanishiga jalb qilinishini bartaraf etish masalalari muhokama qilingan.
“Rossiya hududlarida mehnat faoliyati bilan shug‘ullanayotgan fuqarolarimizning katta qismi borligini hisobga olib, ularning huquq va manfaatlarini himoya qilishda ko‘maklashish, shuningdek, vatandoshlarimiz tomonidan jinoyatlar sodir etilishi va noqonuniy xatti-harakatlarga yo‘l qo‘yilishining oldini olish maqsadida biz Rossiya Federatsiyasining bir nechta shaharlarida Qirg‘iziston IIV vakolatxonalari faoliyatini yo‘lga qo‘ydik”, deyiladi Qirg‘iziston militsiyasi bayonotida.
Rossiya IIV ushbu vakolatxonalar huquq-tartibot organlari o‘rtasidagi hamkorlik 2017-yil 20-iyundagi hukumatlararo bitim asosida amalga oshirilishini eslatib, vakolatxonalar xodimlari soni tomonlarning kelishuviga ko‘ra belgilanishini eslatib o‘tgan.
Vakolatxonalarning asosiy vazifasi o‘z mamlakatlari fuqarolariga, jumladan, Qirg‘izistondan Rossiyaga va aksincha ko‘chib o‘tish masalalarida yordam ko‘rsatishdan iborat bo‘ladi.
Qayd etilishicha, Rossiya Federatsiyasi migratsiya xizmati Qirg‘izistondan kelgan militsionerlarga 72 mingdan ortiq qirg‘izistonlik migrantlar Rossiya qonunlarini buzayotgani haqida ma’lumot bergan.
Izoh (0)