Fransiyada giyohvand moddalar savdosiga qarshi kurash bo‘yicha “XXL operatsiyasi” o‘tkazilmoqda, deya Euronews xabar berdi.
Reydlar bir hafta oldin Marselda boshlangan edi. Fransuz politsiyasi 25-mart kuni tekshiruvni Lill, Lion Dijon va poytaxt mintaqasida hamda bir nechta shaharlarda amalga oshirgan.
Hafta boshidan buyon 190 dan ortiq gumondorlar hibsga olindi. Biz 25 kilogramm kannabis va bir kilogrammdan ortiq kokainni musodara qildik. Bu butun bo‘lim uchun juda muhim natijadir, — deydi politsiya prefekti Pyer Eduard Kollier.
Tintuv chog‘ida nafaqat giyohvand moddalar, balki qurol-yarog‘lar, katta miqdordagi naqd pullar va bank cheklari ham topilgan. Har kuni 1000 nafargacha huquq-tartibot idoralari xodimlari — jandarmlar, militsiya xodimlari va bojxona xodimlari reydlarga jalb etiladi.
Prezident Emmanuel Makron narkotik moddalar savdosiga qarshi kurash va tartibni tiklash bo‘yicha misli ko‘rilmagan operatsiyani e’lon qilib, unga “Hududni tozalash XXL” nomini bergan.
Fransiya Ichki ishlar vaziri Jerald Darmaninga ko‘ra, reyd bir necha oy davomida tayyorlangan. U yaqin kunlar va haftalarda giyohvand moddalar jinoyatiga kuchli zarba berish uchun reydlar soni ortishini qo‘shimcha qilgan.
Marseldagi hudud va tarqatish punktlarini nazorat qilish uchun narkotik kartellari o‘rtasidagi urush o‘tgan yili jiddiy zo‘ravonlik avj olishiga sabab bo‘lgan. Hodisa oqibatida 49 kishi qurbon bo‘lgan, 120 dan ortiq kishi jarohatlangan edi.
Izoh (0)