Ukrainada joriy yilning besh oyi davomida faol safarbarlik sharoitida deyarli 23,5 ming talaba universitetlardan chetlashtirildi. Bu haqda mamlakat ta’lim vaziri o‘rinbosari Mixail Vinnitskiy ma’lum qildi.
“Biz yaqinda safarbarlik yoshidagi abituriyentlar uchun o‘quv jarayonini tashkil etishning muammoli masalalari bo‘yicha o‘tkazilgan bir qator tadbirlar natijalarini muhokama qildik. 2024-yil aprel-avgust oylarida 30 yoshdan oshgan 23 448 nafar oliy o‘quv yurti talabalari Ukraina OTMlaridan chetlatildi”, deb yozdi Vinnitskiy Facebook ijtimoiy tarmog‘ida.
Uning so‘zlariga ko‘ra, bunday talabalarni o‘qishdan chetlashtirish asosli, chunki ular aslida “talaba bo‘lishni rejalashtirmagan, lekin bu maqomdan boshqa mas’uliyatdan qochish uchun foydalanmoqchi”.
Bundan tashqari, vazir o‘rinbosarining taʼkidlashicha, militsiya universitet xodimlariga nisbatan sakkizta jinoiy ish qo‘zg‘atgan, bir qancha taʼlim muassasalari harbiy yoshdagi erkaklarning pora evaziga ommaviy ravishda o‘qishga kiritilishi sababli litsenziyasidan mahrum bo‘lgan.
Ukrainada safarbarlikni kuchaytirish haqidagi qonun 18-maydan kuchga kirgan edi. Hujjat harbiy xizmatni o‘tashga majbur bo‘lgan barcha shaxslarni kuchga kirgan kundan boshlab 60 kun ichida harbiy xizmatga chaqirish bo‘limida o‘z ma’lumotlarini yangilash majburiyatini yuklaydi.
Qonun loyihasida harbiy xizmatni o‘tashga majbur bo‘lganlar o‘zlari bilan har doim harbiy guvohnomani olib yurishlari va uni harbiy xizmatga chaqirish bo‘limi xodimlari va ichki ishlar organlarining birinchi talabiga ko‘ra ko‘rsatishlari shartligi belgilab qo‘yilgan.
Izoh (0)