Rossiya Qurolli kuchlari yuzlab yamanliklarni Ukrainadagi urushda ishtirok etish uchun yolladi. Bu haqda yamanlik yollanma askarlarga tayanib, Financial Times xabar berdi.
Xabarga ko‘ra, ularga Rossiyada yuqori maosh va fuqarolik va’da qilingan. Bu ishni husiylar bilan aloqador kompaniya taklif etgan. Yamanliklar Rossiyaga kelganlarida, ularni Mudofaa vazirligi bilan shartnomalar imzolashga majburlashgan va urushga jo‘natishgan, deb ta’kidlaydi gazeta suhbatdoshlari.
FT taxminiga ko‘ra, yaman askarlarini yollash 2024-yilning iyul oyidayoq boshlangan. Jurnalistlar shartnomalardan biri bilan tanishib chiqqan. Unda 3-iyul sanasi qayd etilgan va u Nijniy Novgoroddagi urushga yo’llash markazi rahbari tomonidan imzolangan.
Yollanganlardan biri — Nabil sentyabr oyida Moskvaga kelgani va frontga jo‘natilgan taxminan 200 nafar yamanlikdan iborat guruhning a’zosi bo‘lganini aytdi. U guruhidagi ba’zilar tajribali harbiylar bo‘lsa-da, ko‘pchiligi tayyorgarlikka ega bo‘lmaganini ta’kidladi.
Nabil “xavfsizlik” va “muhandislik” sohalarida foydali ish va’dasi bilan Rossiyaga aldab olib kelingan. U Rossiyada pul ishlab, o‘qishini tugatishni rejalashtirgan.
FTning yana bir suhbatdoshi Abdulla esa unga dronlar ishlab chiqarishdagi ishi uchun 10 ming dollarlik bir martalik to‘lov va oyiga ikki ming dollar maosh va’da qilinganini esladi. 18-sentyabr kuni Moskvadagi aeroportga kelganida, uni boshqa yamanliklar bilan birga shahardan 5 soatlik masofada joylashgan obyektga olib ketishgan.
Ular shartnomani imzolashdan bosh tortganlarida, u yerdagi erkaklardan biri ularning boshi uzra to‘pponchadan o‘q uzgan, deydi Abdulla.
Keyin ularni Ukraina bilan chegaragacha olib borishgan, oddiy harbiy tayyorgarlikdan o‘tkazishgan va Rostov yaqinidagi harbiy bazaga jo‘natishgan.
Abdullaning ta’kidlashicha, u bilan birga bo‘lgan guruhning ko‘pchiligi Ukrainada halok bo‘lgan. Ularni urushga “odamlar bilan savdo qiluvchi firibgarlar” olib kelgani ta’kidlangan.
Rossiya va Yaman hamkorligi
OAV Rossiya rasmiylari Yaman husiylari bilan hamkorlik qilayotgani haqida bir necha bor yozgan. CNN maʼlumotlariga ko‘ra, Rossiya iyul oyi oxirida Yaman husiylariga raketa va harbiy texnika yetkazib berishga hozirlik ko‘rgan, biroq Saudiya Arabistoni ogohlantirishlaridan so‘ng oxirgi lahzada bu rejalaridan voz kechgan.
Reuters agentligining G‘arb va mintaqaviy manbalarga tayanib xabar berishicha, Rossiya Eron vositachiligida husiylar bilan P-800 Oniks kemaga qarshi qanotli raketalarini yetkazib berish bo‘yicha yashirin muzokaralar olib bormoqda.
Izoh (0)