Agar Ukraina Oliy Radasi ayollarni safarbar qilish to‘g‘risidagi qonunni qabul qilsa, prezident Vladimir Zelenskiy uni imzolamaydi. Bu haqda Zelenskiy yil yakunlari bo‘yicha o‘tkazilgan matbuot anjumanida va’da berdi.
“Ayollar — yo‘q, imzo chekmayman” — dedi u tegishli savolga javoban.
Ukraina prezidenti safarbarlik yoshini 27 yoshdan 25 yoshgacha pasaytirish g‘oyasi haqida gapirar ekan, “agar barcha dalillar keltirilsa” bu tashabbusga “qo‘shilishini” ta’kidladi.
Ayni paytda Ukraina Oliy Radasi ayollarni harbiy xizmatga chaqirish imkoniyatini ko‘zda tutuvchi qonun loyihasini muhokama qilmoqda. 18-dekabr kuni “Xalq xizmatkori” partiyasidan Rada deputati Maryana Bezuglaya Facebook’da hujjat haqida gapirdi.
Deputat formulalardan birining mazmun-mohiyatiga to‘xtalib o‘tdi:
“Harbiy ro‘yxatga olingan ayollar harbiy xizmatga chaqirilishi yoki urush davrida davlat mudofaasini ta’minlash bo‘yicha ishlarni bajarish uchun jalb etilishi mumkin”.
Qonun loyihasida, shuningdek, harbiy holat davrida harbiy ro‘yxatga olingan ayollar qo‘llab-quvvatlash bo‘linmalarida xizmat qilish uchun chaqirilishi mumkinligi aytiladi. Bundan tashqari, shartnomaga ko‘ra, ular jangovar bo‘linmalarga ham chaqirilishi mumkin, dedi Bezuglaya.
Deputat davlat xavfsizlik idoralarini ayollarni harbiy ro‘yxatga olish borasidagi siyosati uchun tanqid qildi. Shu bilan birga, u ayollar “frontga” faqat ixtiyoriy ravishda borishi kerakligini ta’kidladi.
Izoh (0)