Yevropa ittifoqi Ukrainani muntazam qo‘llab-quvvatlashiga qaramay, Rossiya bilan qarama-qarshilikda uni yetarlicha resurslar bilan ta’minlay olmadi, deya tan oldi Yevropa ittifoqining tashqi ishlar bo‘yicha Oliy vakili Josep Borrel.
U o‘z blogida Yevropa ittifoqi diplomatiyasi rahbari sifatidagi mandati sarhisob qilingan maqola chop etdi. Borrel noyabr oyi oxirida o‘z lavozimini tark etadi.
“Biz Ukrainaga moliyaviy, gumanitar va harbiy yordamimizni davom ettirdik. Shu paytgacha bu maqsadlar uchun 122 milliard yevro, jumladan, harbiy yordam uchun 45 milliard yevro ajratdik. Shuningdek, yaqinda Rossiyaning muzlatilgan aktivlaridan tushgan mablag‘ni Ukraina uchun ishlatishga qaror qildik”, deb yozdi u.
“Ammo bularning barchasiga qaramay, biz Ukrainani o'zini himoya qilish uchun yetarli resurslar bilan ta'minlay olmadik. Qish ukrainaliklar uchun juda og'ir bo'ladi, elektr ta'minotida katta uzilishlar bo'ladi. Shuningdek, Ukrainaga, o'q-dorilarni vaqtida yetkazish bo'yicha yetarlicha yordam bera olmadik”, davom etdi diplomat.
Borrelning so‘zlariga ko‘ra, Ukrainada sodir bo‘layotgan voqealar “Yevropa ittifoqi uchun ekzistensial tahdiddir”.
“Bu global miqyosdagi dunyo tartibining yo'q qilinishiga olib keladi. Mazkur holat yevropaliklarni o'z xavfsizligi haqida qayg'urishga ko'proq undashi kerak”, deya qo‘shimcha qildi Borrel.
Avvalroq Josep Borrel 2024-yil oxirigacha Yevropa ittifoqi Ukrainaga 1 million o‘q-dori yuborish rejasini bajarishini aytgandi.
Unga ko‘ra, Ukraina qurolli kuchlari allaqachon 980 ming dona snaryad olgan. Boshqa kelishuvlar va tashabbuslarni hisobga olgan holda, Ukraina yil oxirigacha Yevropadan 1,5 millionta snaryad olishi ma’lum qilingan.
Yevropa ittifoqi oliy vakilining so‘zlariga ko‘ra, snaryadlarni Ukrainaga yetkazib berish muddatlari ishlab chiqarish quvvati pastligi sababli kechiktirilgan. Uning aniqlik kiritishicha, Yevropa ittifoqi ishlab chiqarish quvvatini oshirdi, bu esa Ukraina Qurolli kuchlarini hozirgi darajada o‘q-dorilar bilan ta’minlashni davom ettirish imkonini beradi.
Izoh (0)