Buyuk Britaniya hukumati Ukraina uchun hujum va razvedka dronlarini sotib olishga taxminan 9,5 million dollar ajratmoqchi.Bu haqda Britaniya hukumati matbuot xizmatiga tayanib, “RBK-Ukraina” xabar berdi.
“Hukumat yangi hujum va kuzatuv dronlarini xarid qilish uchun 7,5 million funt sterling (9,5 million dollar) miqdoridagi qo‘shimcha harbiy yordamni e’lon qilmoqda”, deyiladi bayonotda.
Qayd etilishicha, dronlar Ukrainaga Buyuk Britaniya va Latviya boshchiligidagi Kiyev uchun dronlarni birgalikda xarid qilayotgan davlatlar koalitsiyasi orqali yetkazib beriladi.
Aniqlik kiritilishicha, Ukraina uchun dronlar xarid qilishga berilayotgan mablag‘ moliyalashtirish fondidan ajratilgan.
Shu bilan birga, hukumat dron koalitsiyasi yana 16 million funt sterling (20 million dollardan ortiq) olishini taʼkidlamoqda. Xususan, pulni quyidagilar ajratgan: Germaniya (10 million funt yoki 12 700 million dollar); Kanada (3 million funt yoki 3,8 million dollar); Lyuksemburg (3 million funt yoki 3,8 million dollar). Bu dron koalitsiyasining umumiy fondini 67 million funt sterlingga (85 million dollardan ortiq) yetkazadi.
Dron koalitsiya jamg‘armasi dronlarni sotib olish va keyin ularni ukrainalik harbiylarga yuborish uchun yaratilgan. Jamg‘arma tashkil etilganda, unga taxminan 45 million yevro mablag‘ ajratilishi ta’kidlangandi.
Avvalroq Germaniya Ukrainaga navbatdagi harbiy yordam doirasida Helsing kompaniyasi tomonidan ishlab chiqarilgan sun’iy intellektga ega 4000 ta dron yetkazib bermoqchi ekani aytilgandi.
Mini-Taurus nomli uchuvchisiz uchish qurilmalari zamonaviy tizimlarga ega. Bu esa ularni Rossiyaning elektron urush tizimlariga qarshi bardoshli qiladi. Bundan tashqari, dron qiyin ob-havo sharoitida ham relyefni tahlil qilish va joylashuvni aniqlash imkoniga ega.
Shuningdek, Nigeriya mamlakati ham o‘zining razvedka va hujumchi dronlarini ishlab chiqarishni boshlagani xabar qilingandi.
Mazkur dronlarning eng kattasi yuklarni 20 km gacha bo‘lgan masofaga yetkazish uchun mo‘ljallangan bo‘lib, maksimal uchish og‘irligi 55 kg ni tashkil qiladi.
Izoh (0)