Samarqand viloyatining Bulung‘ur va Toshkent viloyatining Olmaliq shahrida “svet” hamda gazdan qarzdorlikni yo‘q qilib berishni vaʼda qilgan gazchi va hisobchi ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Bulung‘ur tumanida tumangaz taʼminoti bo‘limi mahallada ishlash xizmati gazchisi S.X. fuqaro M.B.ning xonadonida ko‘rik davomida tabiiy gaz taʼminotidan aniqlangan 1,6 mln so‘m zararni 14 mln so‘m ekanini aytgan.
U go‘yoki ushbu zarar miqdorini kamaytirib berishi evaziga M.B.dan 4,4 mln so‘mni olgan vaqtida ashyoviy dalillar bilan ushlangan.
Shuningdek, Olmaliq shahar ETK hisobchisi Z.A. fuqaro D.N.ning “Do‘stlik” MFYdagi uyining elektr taʼminotidan 5 mln so‘m qarzdorligini yo‘q qilib berishi evaziga 3 mln so‘mni olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Qarzdorlikni yo‘q qilib beruvchi “uddaburon”lar
Aprel oyida Toshkent shahri, Andijon va Samarqand viloyatlarida qarzdorlikni yo‘q qilib berish uchun pul olganlar ushlangan edi.
May oyida ham Andijon va Jizzaxda gaz va “svet”dan noqonuniy foydalanish holatlarini rasmiylashtirmaslikni vaʼda qilgan shaxslar ushlangan.
Shuningdek, iyul oyida Samarqandda tuman elektr ta’minoti korxonasi sobiq xodimi tadbirkorning 14 ming dollarini qo‘lga kiritmoqchi bo‘lgani haqida xabar berilgandi.
Izoh (0)