Kreml Turkiya prezidenti Rajab Toyyib Erdo‘g‘onning Ukrainadagi jangovar harakatlarni muzlatish haqidagi taklifini Moskva uchun nomaqbul deb atadi.
“Jang chizig‘i bo‘ylab harbiy harakatlarni muzlatish varianti Rossiya tomoni uchun mantiqqa to‘g‘ri kelmaydigan narsa”, dedi Rossiya prezidenti matbuot kotibi Dmitriy Peskov.
“Bu holda, prezident Putin tomonidan ishlab chiqilgan iyun shartlari o‘z dolzarbligini to‘liq saqlab qoladi. O‘sha shartlarda janglarni to‘xtatish uchun nima qilish kerakligi belgilab qo‘yilgan”, deya ta’kidladi Peskov.
“Rossiya va Turkiya yetakchilari so‘nggi uchrashuvlarida Erdo‘g‘onning Ukrainadagi harbiy amaliyotlarni to‘xtatish rejasini muhokama qildimi?”, degan savolga u shunday javob berdi: “Yo‘q, bu muhokama qilinmadi. Biz bu boradagi xabarlarga e’tibor qaratdik, ammo to‘liq tafsilotlar hali yo‘q. Erdo‘g‘onning so‘zlarida gap nima haqida borayotganini bilmaymiz”, dedi Peskov.
Avvalroq Turkiya prezidenti Rajab Toyyib Erdo‘g‘on G20 sammitida Ukrainadagi mojaroni hozirgi front chizig‘ida muzlatib qo‘yishni taklif qilishi xabar berilgandi.
Manbalarning ta’kidlashicha, Erdo‘g‘on o‘z tashabbusini bugun, 18-noyabr kuni bo‘lib o‘tadigan davlatlar rahbarlari uchrashuvida taqdim etadi.
Turkiyaning taklifi Donbassda qurolsizlantirilgan hudud yaratish va Ukrainaning NATOga kirishini kechiktirishni o‘z ichiga olishi mumkin. Buning evaziga Turkiya rahbari Ukrainaga xavfsizlik kafolatlari va harbiy ta’minotni davom ettirishni taklif qilishi kutilmoqda.
Bugun, 18-noyabr kuni AQSH prezidenti Jo Bayden Ukrainaga Rossiya hududidagi nishonlarga zarba berish uchun uzoq masofali ATACMS raketalaridan foydalanishga ruxsat bergani haqida xabarlar paydo bo‘ldi.
AQSH hukumatidagi manbalarga ko‘ra, bu zarbalar birinchi navbatda Kursk viloyatidagi Rossiya va Shimoliy Koreya harbiy xizmatchilariga qaratilgan bo‘ladi. Baydenning qarori AQSH siyosatidagi tub o‘zgarish bo‘lib, u qayta saylangan Donald Trampning inauguratsiyasidan ikki oy oldin qabul qilindi.
Shuningdek, Ukrainaga ATACMS raketalaridan foydalanishga ruxsat berish Rossiyaning Shimoliy Koreya qo‘shinlarini jangga yuborish haqidagi kutilmagan qaroriga javob ekani ta’kidlangan.
Izoh (0)