Bugun 8-mart kuni Turkiya prezidenti Rajab Toyyib Erdo‘g‘on Istanbulda Ukraina prezidenti Vladimir Zelenskiy bilan uchrashuv o‘tkazadi. Uchrashuvdan so‘ng qo‘shma matbuot anjumani tashkil etilishi ham rejalashtirilgan.
Bu haqda Turkiya prezidenti idorasi ma’lum qilgan.
“Prezidentlar Erdo‘g‘on va Zelenskiy o‘rtasidagi uchrashuv mahalliy vaqt bilan taxminan soat 19:00 da prezidentning Istanbuldagi ish kabinetida bo‘lib o‘tishi kutilmoqda. Ayni damda uchrashuvdan keyin matbuot anjumani o‘tkazilishi rejalashtirilgan”, — deyiladi xabarda.
Erdo‘g‘onning idorasi avvalroq Zelenskiyning tashrifi chog‘ida “Ukraina va Rossiya o‘rtasida davom etayotgan urushning borishi, don yo‘lagi bo‘yicha kelishuvni amalga oshirishni davom ettirish mavzusidagi aloqalarga oid so‘nggi vaziyat batafsil muhokama qilinishini” ma’lum qilgan edi. Shuningdek, Ukrainadagi mojaroni hal qilish yo‘llari va “mintaqada barqaror tinchlikka” olib kelishi mumkin bo‘lgan yechimlar yuzasidan fikr almashinishi ko‘zda tutilgan.
Erdo‘g‘on va Zelenskiy o‘rtasidagi oldingi uchrashuv 2023-yilning 7-iyulida bo‘lib o‘tgan.
Izoh (0)