Xitoy, Braziliya va yana o‘nta davlat Ukrainaga qarshi yadro qurolidan foydalanish yoki qo‘llash bilan tahdid qilishdan ogohlantirdi.
“Biz ommaviy qirg‘in qurollarini, xususan, yadroviy, kimyoviy va biologik qurollarni qo‘llash tahdidlaridan voz kechishga chaqiramiz”, deyiladi 12 davlatning BMT Bosh Assambleyasi doirasida Ukraina bo‘yicha vazirlar yig‘ilishidan so‘ng eʼlon qilingan qo‘shma bayonotida.
Ushbu hujjatga Xitoy va Braziliyadan tashqari Boliviya, Turkiya, Janubiy Afrika, Kolumbiya, Misr, Indoneziya, Qozog‘iston, Keniya, Zambiya va Jazoir ham o‘z imzolarini qo‘ygan. Ushbu davlatlar Ukrainadagi mojaro avj olish xavfidan chuqur xavotir bildirgan.
“Fuqarolik infratuzilmasi, jumladan, atom elektr stansiyalari va boshqa energetika obyektlari harbiy amaliyotlar nishoniga aylanmasligi kerak”, deyiladi bayonotda.
Joriy haftada Rossiya prezidenti Vladimir Putin mamlakat hududiga ommaviy havo zarbalari berilgan taqdirda Rossiya yadro qurolidan foydalanishi mumkinligini ma’lum qilgandi. Shuningdek, u yadroviy davlat ko‘magida Rossiyaga qilingan har qanday hujum mamlakatga qo‘shma tajovuz sifatida baholanishini ta’kidlagan.
25-sentyabr kuni Ukraina prezidenti Vladimir Zelenskiy Moskvani Ukraina atom elektr stansiyalariga hujumga tayyorgarlik ko‘rayotganlikda ayblagan edi. U, shuningdek, Kiyev uchun nomaqbul shartlar asosida Ukrainadagi urushni hal qilishda o‘zlarini vositachi sifatida taklif qilayotgan Xitoy va Braziliyani ham tanqid qilgan.
27-sentyabrda qabul qilingan qo‘shma deklaratsiyada 12 davlat barcha xalqaro nizolarni tinch yo‘l bilan hal etish muhimligini taʼkidlagan.
“Biz BMT nizomi asosida keng diplomatiya va siyosiy vositalar orqali keng qamrovli va uzoq muddatli kelishuvga erishish uchun mojaro tomonlarini qo‘llab-quvvatlashga chaqiramiz”, deydi davlat vakillari.
Izoh (0)