Parij—2024 yozgi Olimpiya o‘yinlari kumush medali sohibi Svetlana Osipova Olimpiadalar va Jahon chempionatlari xususida fikrlarini bildirib o‘tdi.
Taekvondochining MOQ matbuot xizmatiga bergan intervyusida aytishicha, u ayni paytda tiklanmoqda, shuningdek, mashg‘ulotlar ham to‘xtab qolmagan.
— Roppa-rosa 2 yil oldin davlatimiz bayrog‘i qabul qilingan kun arafasida tarixiy jahon chempionligini qo‘lga kiritgan edingiz. Qolaversa, Parij—2024 yozgi Olimpiya o‘yinlarida ham delegatsiyamizga tarixiy medallardan birini keltirdingiz. Keling, o‘sha paytlardagi taassurotlaringizni yodga olib, biz bilan ulashsangiz.
— Har ikki musobaqadagi hissiyotlarimni so‘z bilan ifodalab berolmayman. Jamoamiz bilan sportimiz tarixida ayollar taekvondosida jahon chempionatlarida birinchi oltin va Olimpiadalardagi ilk medalni qo‘lga kiritishni uddaladik. Ushbu natijaga erishishim uchun yordam bergan davlatimiz, assotsiatsiyamiz, jamoam va oilamga minnatdorligimni bildiraman. Tokio—2020 Olimpiadasidan medal ololmaganimdan keyin Meksikadagi jahon chempionligi menga katta turtki bo‘ldi. Mehnat bilan barcha narsaning imkoni borligini tushunib yetganman.
— Sizda barcha musobaqalarning medali bor. Shunday bo‘lsa ham sizni qanday motivatsiya yana dayangga chaqiryapti?
— Ha, menda hamma turnirlarning medali mavjud. Bu ajoyib natija va unda ko‘pchilikning mehnati bor. Motivatsiyam esa, bugun kechagidan yaxshiroq bo‘lishim kerakligi. Bu men uchun eng muhim jihat. O‘zim misolimda barcha narsaning imkoni borligini ko‘rsatishni istayman. Har qanday vaziyat va sharoitda ham nimadir o‘rganish va nimagadir erishish kerak. Men qachondir o‘zgalarga o‘rnak bo‘la olayotganimni sezsam, shu menga motivatsiya beradi.
Avvalroq dzyudo bo‘yicha Parij—2024 yozgi Olimpiya o‘yinlari chempioni Diyora Keldiyorova ham ayni vaqtda jarohatlarini davolayotganini aytgandi.
Izoh (0)