Parij Olimpiadasi O‘zbekiston uchun tom ma’noda rekordlar, mislsiz yutuqlarga boy bo‘ldi. Bu haqda Shavkat Mirziyoyev 28-avgust kuni Ko‘ksaroyda sportchilar, ularning ota-onalari va murabbiylari bilan uchrashuvda aytib o‘tdi.
![](/static/2024/08/28/photo_2024-08-28_11-21-07 (3)-n2keFwH3.jpg)
“Avvalo, mazkur Olimpiadada O‘zbekiston birinchi marta eng ko‘p tarkib bilan, ya’ni, 19 ta sport turi bo‘yicha 90 nafar sportchi bilan ishtirok etganini ta’kidlash lozim. Ayniqsa, ayollar kurashi, kamondan o‘q otish, suvga sakrash, futbol kabi sport turlari bo‘yicha sportchilarimiz ilk bor Olimpiya o‘yinlarida qatnashganini alohida e’tirof etish kerak”, dedi prezident.
![](/static/2024/08/28/photo_2024-08-28_11-27-52-t3YBg1no.jpg)
Uchrashuvda davlat rahbari Olimpiada o‘yinlarida o‘zbekistonlik sportchilar qo‘lga kiritgani rekord natijalarni sanab o‘tdi.
“Masalan, dzyudo bo‘yicha bizda ilgari oltin medal bo‘lmagan edi. Bu safar matonatli dzyudochi qizimiz Diyora Keldiyorova tomonidan ushbu marra zabt etildi. Olimpiya o‘yinlari tarixida o‘zbekistonlik ayollar o‘rtasida birinchi marta oltin medalni qo‘lga kiritdi. Shu tariqa Diyora yana bir rekord o‘rnatdi.
Yana bir jasur qizimiz – Svetlana Osipova esa, taekvondo bo‘yicha birinchi kumush medalni egallab, mamlakatimiz ayollar sporti tarixida yangi sahifa ochdi. Shu tariqa sportchi qizlarimiz bitta Olimpiadada ilk bor 2 ta medalni qo‘lga kiritib, yangi rekord o‘rnatishga erishdilar”, — dedi prezident.
Shavkat Mirziyoyev O‘zbekiston taekvondo bo‘yicha birinchi marta Olimpiya o‘yinlarida 2 ta medalni qo‘lga kiritganini qayd etdi.
“Mohir sportchimiz Ulug‘bek Rashitov Olimpiya harakati solnomasida taekvondo bo‘yicha eng yosh toifada ikki karra Olimpiya chempioni bo‘ldi. Shu paytgacha dunyoda faqat 4 nafar sportchi shunday yuksak sharafga sazovor bo‘lgan edi. Ulug‘bek esa beshinchi bo‘lib, ularning safidan munosib va mustahkam joy egalladi”, dedi davlat rahbari.
![](/static/2024/08/28/photo_2024-08-28_14-19-36-dvUFu2DP.jpg)
Prezident u oyog‘idan qattiq jarohat olganiga qaramay, final jangida kuchli raqibga qarshi mardona jang qilib, g‘olib qahramonga aylanganini ta’kidlab o‘tdi.
Boks bo‘yicha ham milliy terma jamoa oltin medallar soni bo‘yicha O‘zbekiston tarixida Olimpiya o‘yinlari rekordini yangiladi va umumjamoa hisobida 1-o‘rinni egalladi. Erkaklar o‘rtasida yettita oltin medalning beshtasini yoki 71 foizini o‘zbekistonlik bokschilar qo‘lga kiritdi. Fursatdan foydalanib, prezident bokschilar — Bahodir Jalolov, Hasanboy Do‘smatov, Asadxo‘ja Mo‘ydinxo‘jayev, Lazizbek Mullajonov, Abdumalik Xaloqovni shunday yutuqlari bilan yana bir bor tabrikladi.
Erkin kurash bo‘yicha 12 yillik tanaffusdan so‘ng yana Olimpiada oltin medali qo‘lga kiritilgani ham tarixiy yutuq bo‘lgani ta’kidlandi. Shu munosabat bilan davlat rahbari mohir kurashchi Razambek Jamalovni ham tabriklab, unga yangi zafarlar tiladi.
Mamlakati jamoasi erishgan yutuqlarda kumush medal sohibi — og‘ir atletikachi Akbar Jo‘rayev, bronza medal sovrindorlari – erkin kurashchi G‘ulomjon Abdullayev, tajribali dzyudochilar Muzaffarbek To‘raboyev, Alisher Yusupov ham hissasi katta bo‘lgani e’tirof etildi.
![](/static/2024/08/28/photo_2024-08-28_12-52-34-kvMOm175.jpg)
“Yangi O‘zbekistonning bugungi taraqqiyotiga albatta mana shunday ulkan g‘alabalar yarashadi. Shu ma’noda, sizlar Parijda erishgan natijalaringiz bilan o‘z nomingizni milliy sportimiz tarixiga oltin harflar bilan muhrlab qo‘ydingiz”, dedi Shavkat Mirziyoyev.
Prezident ushbu yutuqlarda ustoz-murabbiylar, mutaxassis va mutasaddilar, omad tilab turgan butun xalq hissasi beqiyos ekanini ta’kidladi.
Izoh (0)