Yaponiyaning Tokio shahri mezbonlik qilayotgan Olimpiya o‘yinlarida o‘zbekistonlik sportchilar 27-iyul kungi chiqishlarini yakunladi.
Dzyudo
-63 kg vazn toifasida harakat qilayotgan Farangiz Hojiyeva dastlabki bosqichda Kabo-Verde vakili Sandrin Billetga qarshi bahs olib bordi. Bellashuvda Farangiz og‘ritish usuliga tushib qoldi va Olimpiadadagi ishtirokini yakunladi.
-81 kg vazn toifasida ishtirok etgan Sharofiddin Boltaboyev 1/16 finalda vanuatulik Ugo Kumboga imkon qoldirmadi. Keyingi bosqichda bolgariyalik Ivaylo Ivanovni qo‘shimcha vaqtda mag‘lub etdi. Chorak finalda Boltaboyev avstriyalik Shamil Borchashviliga yutqazib qo‘ydi. Bronza medallari uchun kechgan o‘tish bahsida esa o‘zbekistonlik sportchi Gruziya vakili Tato Grigalashviliga yutqazib qo‘ydi.
Shu tariqa Olimpiadaning yakkalik bahslarida ishtirok etadigan 10 nafar dzyudochidan 6 nafari musobaqa bilan xayrlashishga ulgurdi.
Taekvondo
+67 kg vaznda qatnashgan Svetlana Osipova 1/8 finalda qozog‘istonlik Janzel Denizga qarshi jang qildi. Hisob 9:9 bo‘lib turgan vaqtda Osipova so‘nggi soniyalarda qo‘l zarbasini o‘tkazib yubordi va mag‘lubiyatga uchradi.
Shu tariqa o‘zbekistonlik taekvondochilarning Tokio Olimpiadasidagi ishtiroki yakunlandi. Avvalroq Ulug‘bek Rashidov oltin medalga ega chiqqan bo‘lsa, Nikita Rafalovich va Nigora Tursunqulova o‘z ishtirokini avvalroq yakunlagandi.
Boks
-69 kg vazn toifasi vakili Bobousmon Boturov o‘zbekistonlik bokschilar orasida birinchi bo‘lib 1/8 final bahslarini boshlab berdi. Unga dominikanlik Polando Rohan raqib bo‘ldi. Bobousmon jangni g‘alaba bilan yakunlab, chorak finalga yo‘l oldi. Uni keyingi bosqichda Buyuk Britaniya vakili Pet Makkormak kutib turibdi.
Suzish
Xurshid Tursunov 100 metrga erkin usulda suzish bo‘yicha saralash bosqichida qatnashdi. Xurshid marrani 50.14 soniyada bosib o‘tdi. Bu esa yarim final yo‘llanmasi uchun yetarli bo‘lmadi va o‘zbekistonlik sportchi Olimpiya o‘yinlaridagi ishtirokini yakunladi.
Izoh (0)