Uchinchi oltin. Nikita Rafalovich taekvondo bo‘yicha Osiyo chempioniga aylandi

Janubiy Koreya taekvondo WT bo‘yicha Osiyo chempionati davom etmoqda.

26-iyun kuni -87 kg vazn toifasida O‘zbekiston sharafini himoya qilayotgan Nikita Rafalovich barcha raqiblarini mag‘lub etib, oltin medalga sazovor bo‘ldi. Nikita finalda Iordaniya vakili Fahed Sbeyhini yengdi.

Ayollar o‘rtasida +73 kg vazn toifasida ishtirok etgan Svetlana Osipova bronza medali bilan cheklandi.

Rafalovichning g‘alabasidan keyin O‘zbekiston erkaklar terma jamoasining oltin medallari soni uchtaga yetdi. Bu orqali O‘zbekiston erkaklar terma jamoasi Janubiy Koreyani ortda qoldirib, umumjamoa hisobida birinchi o‘ringa chiqib oldi.

Avvalroq Ulug‘bek Rashidov va Jasur Jaysunov oltin medalni qo‘lga kiritgandi.